Nongstoiñ, Nailar 19: Ka Khasi Students Union Lyngngam Hynneng Brei Area Unit, ha ka jingïalam jong u Samla Banshan Sohbar General Secretary ha jingïadonlang ki dkhot, ka la ïoh ban noh synñiang da ki tin sha ka skul kaba don ha Miangmawdar LP School. Ïa kitei ki tin tap, la ïoh ban aiti ha ka sngi hat majai ha u Ma Filter Riangshiang u ba dei Secretary jong ka Managing Committee jong ka Skul Miangmawdar L.P School kaba don ha ka thaiñ Ri Lyngngam.
Haba ai jingkren u Samla Banshan u la ïathuh ba hadien ba ka seng ka la ïoh pdiang ïa ka shithi na ka Managing Committee na ka bynta ban ïarap ïa katei ka skul. Ka seng mar mar ka la leit jngoh bad lyngngoh haba lap ïa ka jingjot rathai jong katei ka skul kaba la long sha ba palat.
Na ka liang ka seng ka la pynpaw ka jinglyngngoh ba hato balei ka sorkar bad ka tnad ba dei peit ka la shu ieh meinah ïa katei ka shlem ai jinghikai, kat haduh ba ym I kop shuh ban ong ba ka dei ka skul pule na ka bynta ban pynphriang ïa ka jingnang jingstad. Na ka liang ka seng ka kyntu ïa ki bor ba dei peit, kum u Block Development Officer, kumjuh ïa u local MLA ban phai khmat lem sha katei ka skul bad ban pynkloi ïa ki lad jingïarap sha katei ka skul. Na ka liang ka Seng la kular ruh ban ïai buddien ïa ka jingdonkam jong katei ka skul.
Na ka liang u Ma Filter Riangshiang u la ïathuh ba ha ka por lyiur ki la hap ban ai shuti namar ka jinghap slap ba man ka por. U la pynpaw ruh ka jingsngewnguh ïa ka Khasi Students Union Lyngngam Hynneng Brei Area Unit, namar ka jinglong la kloi jong ka Seng ban synñiang ïa ki tin na bynta ka skul kaba don ha Miangmawdar kaba la jot la pra bad ym shym la don ba phaikhmat sha katei ka skul.
U la ong ruh ba ym shym don satia ba phaikhmat, hynrei mynta dei tang ka KSU kaba la long kaba kloi ban ïarap watla ka sorkar kam shym la sngap ïa ka jingkyrpad jong ka Shnong bad ka Managing Committee.
U la ïathuh ruh ba la dep ban ai jingthoh ruh sha ka Shallang C&RD Block bad sha u Local MLA na bynta ki jingïarap, hynrei u la kyrpad ruh ïa ka seng ban ïarap ban buddien lem ïa kitei ki bynta ruh.
