Nongpoh, Nailar 19: Namar ka jingbun ki paidbah kiba ju mlien ban bam khana bad bret jaboh harud surok bad haki jaka jngohkai pyrthei kaba la pynsniewdur bad pynjaboh ïaka mei mariang bad khamtam kaba lah ban ktah ruh ïaka koit ka khiah, u District Magistrate ka Ri-Bhoi u Dr. Abhishek Saini u la pynjari syndon da ki kyndon aiñ ban mana ïaki paidbah ba kim bit ban shet ne bam khana, ban bret jaboh haki rud surok bad pynjaboh bad pynsniewdur ïaki jaka jngohkai pyrthei ha baroh kawei ka Ri-Bhoi District.
Naka liang u District Magistrate katkum ka jingpynkup bor lyngba ka kyndon 163 jong ka Bharatiya Nagarik Suraksha Sanhita, 2023 u la mana ban shet ne bam khana da kaba pyndonkam da ki dieng ne rnga ne tyndong gas ha surok, ki jaka paidbah ne jaka jngohkai pyrthei.
La mana ruh ïaki paidbah ban bret ïaki jakhlia bad jaboh jabaiñ haki jaka paidbah, ki jaka ba long khlaw, ki rud surok, ki nala ne ki wah bad kino kino kiba pynkheiñ bad leh pyrshah kin ngat haka jingpynshitom katkum ka kyndon 223 jong ka Bharatiya Nyaya Sanhita, 2023 bad kiwei kiwei ki kyndon bad kane ka hukum kan treikam mardor tad haduh ban da pynbna da kumwei.
