Shillong, Nailar 19 : Ka United Democratic Party (UDP) ha ka sngi Balang ka la shong ïa ka Central Executive Committee (CEC) na ka bynta ban ïa kren bad ïatai halor kiba bun kip hang kiba ïadei na ka bynta ban pynkhlain shuh shuh ïa ki nongrim treikam jong ka party nangne shakhmat.
Haba kren bad ki lad pathai khubor hadien ka jingïalang, u President ka party, Bah Metbah Lyngdoh, u la ong ba ka jingïalang jong ka Central Executive Committee ka dei ka jingïalang kaba ju long man ka por, ha kaba ki nongïalam bad ki nongtrei na ki distrik bapher bapher ki wan lang ban ïa phylliew jingmut halor ki kam jong ka party.
“Ki mat ba kongsan jong ka jingïalang ka long ban peit ïa ki lad ki lynti kumno ban pynkhlaiñ shuh shuh ïa ka party bad ban pynurlong ïa ka nongrim jong ka party,” u la ong.
Da kaba pynpaw ba ïa ki buit treikam jong ka party kin neh beit ha ka party khlem da paw shabar, u Bah Metbah u la ong pat ba ka thong hi ka long ban pyntikna ba ki mat treikam jong ka party kin poi lut sha ki paidbah nongshong shnong.
