Ka jingkyntu ïa ki paidbah ban long kiba husiar ha ka por ba jur slap : CEO, DDMA

Mawkyrwat, Nailar 19 : U Additional Deputy Commissioner & CEO ka District Disaster Management Authority (DDMA), South West Khasi Hills District, Mawkyrwat, u la pynmih ka jingkyntu sha baroh ki paidbah ban shimkhia ïa ki lad jingïada bad ban long kiba husiar ha ka por ba jur slap, khnang ban lait na ki jingma kiba lah ban mih na ka jingshlei um, ka jingtwa khyndew bad kiwei kiwei ki jingjia kiba iadei bad ka jingwan hap u slap uba jur.
Ha kane ka jingkyntu, u la kyntu ïa ki paidbah ba kin kiar na ka leit sha ki jaka kiba ju shlei um bad ki jaka kiba ju twa khyndew, khamtam ha ka por ba jur slap. La kyntu ruh ïa ki paidbah ba kin shong hapoh ïing bad kiar na ka jingïaid paidbah lada ym donkam eh.
La kyntu ïa ki nongkhaïi/nongtong doh ha ki wah (nongkwai/rawon) ba kin ym leit khwai ne tong doh ha ki wah heh ne wah rit ha ka por ba jur slap, namar ka lah ban wanrah ïa ka jingma ïa ka jingim.
Ym tangkata, u la kyntu ruh ïa ki nongshangkai ne ki Tourist ba kin kiar na ka leit sha ki jaka bapher bapher ha ka por ba jur slap, khamtam ha ki jaka ba don ka jingma, namar ka jingjur slap ka lah ban pynlong ïa ki surok bad ki jaka ba long paidbah kiba ma bad ki dei ruh ban peit ïa ka jinglong jingman jong ka siuñbneng.
Ha kajuh ka por, u la kyntu ïa ki nongñiah kali ba kin kiar na ka ñiah kali ha ki surok ba shlei um bad ha ki jaka kiba lah ban twa khyndew, khnang ban ïada ïa ka jingim bad ka jingbit jingbiang jong ki nongleit nongwan.
U CEO ka DDMA u kyntu ïa baroh ki paidbah ba kin bud ryntih ïa ki jingbthah jong ka bor synshar district bad ban shim ïa baroh ki lad jingïada kiba donkam ha ka por ba jur slap khnang ban lait na kino kino ki jingjia ba sngewsih.