Ka jingshakri bad ka jingaiti lut ka Kong R.V.Suchiang ïa ka jylla kan sah kynmaw: Conrad

Shillong, Nailar 18: U Myntri Rangbah ka Jylla Meghalaya u Conrad K Sangma u la pynpaw ïa ka jingsngewkhia halor ka jingkhlad noh jong ka Chief Secretary barim ka jylla Meghalaya ka Kong Rebecca V. Suchiang.

Ha ka khubor sngewlem, u Sangma u la batai ïa ka kong RV Suchiang kum ka nongtrei sorkar kaba don burom bad u la kdew ïa ka jingnoh synñiang jong ka sha ka synshar khadar jong ka jylla bad ka jingshakri paidbah.

“Kum ka Chief Secretary kynthei trai ri kaba nyngkong eh, ka Kong Rebecca ka la shim ïa ki rai kiba shlur ha ki por kiba eh bad la burom ïa ka namar ka jinglong nongïalam jong ka hapdeng ki paralok jong ka, ka jingïalam jong ka ïa ki junior bad ka akor treikam kaba ai mynsiem,” ong u Myntri Rangbah ka Jylla.

U Sangma u la pynkynmaw ruh ïa ka jingkut jingmut jong ka ha ka por ba ka la pang slem bha, da kaba ong ba ka la “ïaleh shlur” bad ka la bteng ban trei wat hapdeng ki jingeh ha ka koit ka khiah.

“Ka jingshakri bad ka jingaiti lut jong ka kong RV Suchiang na ka bynta ka jylla kan sah kynmaw,” u la ong, haba pynpaw ïa ka jingsngewlem kaba khraw sha kiba haïing hasem bad kiba ieid ba thoiñ jong ka.

Ka kong Suchiang, ka dei ka ophisar IAS jong ka batch 1989 jong ka ka Assam-Meghalaya cadre, ka la bam smai kum ka kynthei trai ri trai muluk ba nyngkong eh jong ka Jylla Meghalaya ha ka 30tarik Nailur, 2021 hadien ba ka la mih bujli ïa u M S Rao.

Tang kawei pat ka kynthei Chief Secretary jong ka jylla Meghalaya ka dei ka P.P Trivedi kaba la bat ïa kane ka kam naduh u snem 1983-85.