‘Ki Dienjat’ ban wadbniah na ka bynta ki paid Khasi-Jaintia bad ka thaiñ Southeast Asia

Shillong, Nailar 18: U Myntri Rangbah, Conrad K Sangma, mynta ka sngi, ula pynlait ïa ka, ‘Ki Dienjat’, ka jingwadbniah na ka bynta ban bishar bniah biang ïa ka jingdon jingïadei ka rukom im bad ka kolshor jong ki paid Khasi-Jaintia bad ka thain Southeast Asia.

Kiba la ïadonlang ki long u Myntri ka Arts & Culture Bah Sanbor Shullai, u Justice Hamarsan Singh Thangkhiew, u Principal Secretary, Arts & Culture, ki dkhot ka kynhun wadbniah bad ki Ophisar na ka tnad Arts & Culture.

U Myntri Rangbah haba ai jingkren, ula ong, “Ki Dienjat”, ka dei ka lynti ïaid ban shem pat-pynïasoh biang ïa ka mynnor jong ngi khnang ban gin lah ban sngewthuh kham bha ïa ka mynta bad pynwandur ïa ka lawei jong ngi.Ula bynrap ba ka jingpynlait ka dei shibynta jong ka jingpyrshang ba ïai bteng ban buh jingthoh, tyngkai bad rakhe ïa ka kolshor bad ka histori jong ka Jylla jong ngi, bad ban ai ha ki briew ïa ka atiar ban lap biang ïala ka tynrai.

Ula bynrap ba haba pynshong nongrim na ki kot ki sla jong ka juk synshar ka ri Bilat bad ka jingstad nala tynrai, ki scholar bad ki nongwad bniah trai ri, kala poi sha ka jingmynjur lang ba ka Jaidbynriew Khasi bad Jaintia ki lah ban dei kiba mih naka thain kum ka jaka ba tip mynta ka Cambodia bad Laos.

Ula pynpaw shuh shuh ba ki jingwad bniah ïa kaei kaba long ba man mynta ban pynshisha ïa kine ki jingdon jingiadei kat kum ka histori kala shah khanglad da ka jingduna ka jingbei tyngka ban leit wad jingtip shabar Ri, ki jingeh ha ka liang ka jingpynbiang ïa ki jingdonkam bad ki jingïadei sain pyrthei ban leh ïa kine ki thain, ka jingbym don ka jingïatreilang kaba la pynbeit ryntih ha ka kam pule bad wad bniah, bad ka jingkyrshan ba pahuh ïa ki jaka pule.

“Ban weng ïa kane ka jingeh, ngi la thung ïa ka kynhun wadbniah ba kyrpang hapoh ka Tnad Arts & Culture, haba wanrah lang ïa ki scholar ba pawnam bad ki Ophisar ba kin ïalam ïa ka jingpyrshang ban leh bniah, jingpyrshang ban wad jingtip, buh jingthoh bad shong bishar ïa ki tynrai ki longshuwa jong ki Jaidbynriew jong ngi” ula ong.

Halor ka Ki Dienjat e-Portal bala pynlait ha kane ka jingialang, u Myntri rangbah ula ong ba ka e-Portal ka dei kaba la pynwandur ban lah pynlong ïa ka jingwad bniah kaba kham treikam, kaba lah ban iohi da baroh bad ka rynsan ban ioh ïa ki jingtip, ban lum thup ïa ki data wadbniah bad ban pynlah ïa ka jingiatreikam lang, ka ban pynsted ïa ka jingiakren, pynduna ïa ka jingpyndonkam ïa ki kot ki sla bad ka jingpynlut ha ka jingpyniaid kam nalor ka jingpynjanai ïa ka jingtreikam kaba shai bad ka jingkhmih bniah.

“Nga kyrmen ba kane ka portal kan ai jaka ruh ha kaba ki nongwadbniah, ki jaka pule bad ki jaidbynriew ki lah ban wanlang ban iasam ïa ki jingtip bad ngam jylliew ïa ka jingsngewthuh ïa ka jinglong ba kyrpang jong ngi bad ïa ka pateng”

U Myntri Rangbah ula pyntip ruh ba watla ka jingpyrkhot ban leh ïa ka jingwadbniah ïa ka tynrai jong ki Jaidbynriew riewlum ka Jylla kala sdang naduh ka por u (L) PA Sangma, uba la ban jur ïa ka jingdonkam ban leh ïa ka jingwadbniah ba jylliew ïa ka tynrai jong ki Garo.Ula pyntip ba kum kane ka project wad bniah yn sa pynlait ruh ha ri-lum Gar0 ha ka 1 tarik Nailur, 2026, ha ka sngi kha jong u (L) PA Sangma.

Haba pynkut, u Myntri Rangbah ula pynkynmaw ia ka jingialang halor ka jingkongsan bad jingdonkam jong kane ka jing wadbniah bad khot ia ka jingiatreilang bad ka jingiashimbynta lang jong baroh ki kynhun ba don bynta.

U Myntri Rangbah ula pynlait ruh ia ka project document ne ki kot ki sla jong ka project bad plie ruh ia ka kamra leh research jong Ki Dienjat hapoh ka Williamson Sangma State Museum, Shillong.

Ka Tracing the Roots Projecr ka dei ka project ban lum bad buh jingthoh ïa ka histori jong ki jaidbynriew trai muluk ka Meghalaya, ka ktien ka thylliej, ka kolshor bad ka jinghiar pateng.

Hapoh kane ka project, 75 ngut ki scholar kin leit sha Vietnam, Cambodia bad Tiber ban wad bniah ia ka thymmei bad ka lynti iaid jong ki Khasi, Jaintia bad Garo sha kane ka thain.