Shillong,Nailar 18 : Ka jingïakhun jong ka Shillong Premier League 2026 ha kane ka sngi Ba-ar ka la sdang biang da kaba ka Meghalaya Police FT ka la ïoh ban pynliem ïa ka Langsning FC da 2-1, ha ka jingïakhun kaba itynnad bha kaba long ha SSA Stadium, Polo.
Ïa kine ki artylli ki kol jong ka MLP FT la thep ïa ki ha baroh ki ar kylla jong ka jingiakhun lyngba u Rapborlang Marwein ha ka minit kaba 44 jong ka kylla step bad ïa ka kol kaba ar pat lyngba u Aldrin Ramsiej ha ka minit kaba 89 jong ka kylla miet.
Katba ïa ka shi kol jong ka Langsning FC pat la ïoh ban thep da u Rohan Manar ha ka minitkaba 90+3.
Ha kane ka jingiakhun baroh ar kynhun ki la wanrah ïa la ki jong ki jingkylla ha ka thup ïalehkai sdang ka jong ki, ha kaba na ka liang ka MLP FT, u Niawkorlang Kyndiah bad Balmingstar Lyngkhoi ki la ïoh ban mih madan ha ka jaka ka jong u Pynshailang L Lyngkhoi bad Bisharlang Kharumnuid.
Katba na ka liang ka Langsning FC ki jingkylla ha ka thup ïalehkai naba sdang ka ka long ba u Nister Roy Suting, Richie Kharbani, Chusrang Sangma bad Samuel Phawa ki la ïoh ban mih madan noh shwa ka jaka ka jong u Rajat Paul Lyngdoh, Wallambok Dkhar, Rohan bad Dibormi Kassar.
Kumban shu pyn-kynmaw ba ka kynhun ïalehkai ka Langsning FC ka wan sha kane ka jingïakhun hadien ba ka la dep ban aireng ha ka lympung ïalehkai jong ka Durand Cup 2026.
Related Posts
Haba phai sha ka Langsning ha ka jingïakhun ha ka kylla step la shem bad ïohi ba ka la ïoh tang artylli ki kabu ban ban jan ïoh pynkhih jar, kata kawei ha ka minit kaba 32 lyngba u Richie Kharpran bad une u juh pat u rangïalehkai u la ïoh ïa ka kabu kaba paka bha hynrei la khang noh ïa ka bol ban leit sha kol da ka jingtbit u rang ap kol ka MLP FT u Eveningstar Bareh.
Haba phai pat sha ka rukom ïalehkai jong ka MLP FT, ki 45 minit ba la ïakhun nyngkong, ki sei madan ïa ka sur ïalehkai ban nion shakhma. La ïohi ba ha ka freekick lyngba u Rapborlang ka la suh beit sha kol ka Langsning, kaba hangne u Nister um shim la ïohi bha shuh shano kane ka bol ka don namar ka jingkah ki paralok ba ïalehkai lang. Kumta beit beit kane ka bol ka la leit beit sha kol.
Kum ka kynhun ka Langsning FC ka la shaniah tylli bha ha u Syed Ahmed uba la lah ban thep saw kol ha ka Durand Cup, hynrei mynta ka sngi, ki la shah tehlakam bha, ha kaba ka kabu ksiar kaba la mih na u ka dei tang kawei ka bol kaba u la ïoh ba un pashat hynrei la lah ban kyrda ïa ka da u Eveningstar.
Ki la don ruh katto katne ki jingpynleh nohei ïa kiba ba bun ki kabu ksiar kaba ki ar kynhun ki la ïoh, kaba lehse kane ka la kham ktah jur bha ïa ka kynhun ïalehkai ka Langsning FC kaba kum ka lahduh jong kane ka lympung kan babe ba kam shim la lah ban pynurlong pat ïa ka sha ki kol. Hynrei na ka liang ka MLP FT wat la ka pynlehnohei, hynrei ka jingjop ba ka la ïoh ba kan khur, kan dei ka sngi jong ka jingkmen bad kaban nang ai mynsiem shuh shuh ïa ka na ka bynta ki jingïakhun kiban dang wan nangne shakhmat.
Kane ka lympung kumban shu ïa tip lang da baroh ka dei beit tang shi kylla (single leg) kaba ka Langsning FC da kane ka namrem kaba mynta ka sngi, nangne hi shakhmat ka kynhun kan hap ba kan kyntiew joit ïa la ka rukom ïalehkai ka jong ka, lada ka thrang ba kan lah ban bat biang ïa ka nam kum ka lahduh.
Kumba long mynta ka MLP FT ka la ïoh ba kan khur 4 point, katba ka Langsning FC ka ïoh ba kan khur shwa tang 3 point.
Lashai pat ka sngi,ka Nangkiew Irat kan mih madan ban ïakhun pyrshah ïa ka Nongkseh SSCC kaban long ha ka por 4:00 baje nohphai sngi.