Don jingkyrmen u Myntri ban ïoh plie pyrda ïa ka National Games ha Mawkhanu Stadium
Ba stet ka rukom pyntrei ïa ka stadium ba heh tam
Shillong, Nailar 18 : Ka Sorkar Jylla ka don ka jingkyrmen ba kin lah ban pyndonkam ïa ka Mawkhanu Football Stadium kaba dang tei mynta ha New Shillong na bynta ka National Games, watla ha ka plan ym shym la kynthup ïa ka kum kawei na ki jaka ban pynlong ïa kane ka lympung kaba heh tam ha ka Ri.
Lah ban kdew hangne ba ka Mawkhanu Football Stadium ka dei ka stadium kaba heh bha kaba la antad ba kan ngiam haduh kumba 40,000 ngut ki nongpeitkai kaba yn shna katkum ki madan kiba heh ha ka pyrthei ba la ïoh jingithuh da ka FIFA.
“Ngi kwah ban pynshai ba ngim shym la thmu ïa kane ka stadium na bynta ka National Games, namar la mangtyngka ïa ka projek dang shen bad ba ka por ban pyndep ïa ka ka long 36 bnai, lane lai snem,” ong u Myntri ka tnad Ïalehkai ka Jylla, Bah Wailadmiki Shylla haba kren bad ki lad pathai khubor.
Katkum ka jingïathuh jong u, ka jingtrei ka ïaid sted bha mynta, bad kane ka la pynlong ïa ka sorkar ban don ka jingkyrmen ba lah ban pynlong ïa ka jingplie pyrda ïa ka National Games ha katei ka stadium.
“Ka dei ka jingkhmih lynti jong ngi ba lada ka jingtrei ka ïaid stet kumba ka ïaid mynta, ngin lah ban pynlong ïa ka opening ceremony hangtei watla ka stadium kan ym pat dep pura ruh,” u la ong.
Related Posts
“Watla ka projek kan ym pat dep lut, ngi lah ban pyndonkam ïa ka bynta jong ka madan bad kiwei ki bynta kiba la dep. Kumta ngi don ïa ka jingkyrmen.”
U la ong ba ka jingtrei mynta ka la kiew bha haba ïanujor bad ki bnai kiba la leit.
“Ha ka por ba nga bad u Myntri Rangbah ngi leit jurip katto katne bnai mynshwa, ki dang sdang ban trei ïa ka nongrim. Hynrei mynta, lada phi peit, ka jingtrei ka la kiew bha.”
U la ong ruh ba ym pat lah ban ong ïa ka percentage kaba thikna jong ka jingpyndep ïa ka projek, hynrei u pynpaw ka jingkyrmen ba ka jingtrei ka ïaid kham sted ban ïa kaba la khmih lynti.
“Nga ym lah ban ong mynta ïa ka percentage, hynrei nga thikna ba ka jingtrei ka ïaid kham sted ban ïa kaba la khmih lynti,” bynrap biang u Myntri.