Nongstoiñ, Nailar 16: Ka kurbah jong ka kur Marthong jong ka Ri Khasi baroh kawei, kum ka dak jong ka jingai mynsiem ïa u heprit Donald Marthong, ka la pynlong ïa ka jingpynkup burom ha Nongstoiñ ha ka sngi saitjaiñ, ha kaba la ïadonlang ryngkat da ki riew rangbah jong ka kur bad ki longkmie.
Lah ban pynkynmaw ba u Heprit Donald Marthong u la wan poi sha la shnong naduh u bnai ba la dep, hadien ba u la ïoh ban leit mihkhmat ïa ka Ri India shabar Ri lyngba ka jingïalehkai Football, ha kaba ka kynhun jong utei u heprit ka la rah ruh haduh ar tylli ki nam lahduh na ki lympung jingïalehkai Football kiba heh.
Ha katei ka sngi pynkup burom bad ai song pisa, la ïadonlang u bah P.W.Myrthong President rangbah jong ka kurbah baroh kawei ka Ri Khasi, u bah G.N Marthong uwei na ki riew rangbah ka thaiñ, u bah B.Myrthong, ki longkmie ki khun samla bad kiwei kiwei.
U President rangbah haba ai jingkren u la ong ba ka jingleh jong ka kur, ka long kum shibynta ban pynpaw ïa ka nuksa ba kiwei ruh kin leh ïa kum kane ka jingpynkup burom, namar kam dei tang na ka bynta ka kur Marthong hynrei ka dei ka jingai mynsiem ban pynshlur ïa la ki khun ki kti namar ka burom ka long na ka bynta ka jaidbynriew baroh kawei.
Lah ban kdew hangne ba utei u heprit Donald Marthong u dei u khun jong u bah Franco Puweiñ bad ka kong Daplin, kiba na ka shnong Risiang jong ka thaiñ Maweit kawei na ki shnong ha ka thaiñ Nongstoiñ West Khasi Hills District.
Kumjuh ruh na ka liang ka Seng kur Myrthjong Khasi Jaiñtia ka la pynlong ïa ka jingïakynduhlang kaba kyrpang ha Nongstoiñ, ha ka sngi saitjaiñ ka 15 tarik Nailar na ka bynta ban pynkup burom ïa une u heprit Donald Myrthong 12 snem ka karta.
