Shillong, Nailar 14: Ka Iing Bishar High Court ha ka Sngi Thohdieng kala pynwai noh ïa ka mukotduma bala mudui da u kyrtong ka VPP prof Batskhem Myrboh hadien ba ka Executive Council ka NEHU kala rai ban ai NOC ba un ïakhun ïa ka elekshon shiteng samoi ka Shillong Lok Sabha.
Haba bishar ïa ka writ petition, ka single bench u Justice HS Thangkhiew la pynpaw ba da ka rai jong ka Council, ym don eiei shuh ban dang hap bishar.
“Naba lah dep rai da ka Executive Council ban ai NOC ïakhun ïa ka elekshon shiteng samoi ka Shillong Lok Sabha sha u Dr Myrboh, ym don eiei shuh ïa ka ïing Bishar ban hap pyrkhat ha kane ka writ petition” ong ka ïing Bishar ha ka hukum.
Ka ïing Bishar kala buh ha ka jingthoh ïa ka copy jong ka rai ka Executive Council ba 04.08.2026 bad pynlong ïa ka kum shibynta na ki record jong ka mukotduma.
