Ka jaiñ ryndia kam dei tang ka jaiñ hynrei ka don ka khana ban pyni ïa la ka kolshor tynrai bad jinglong kyrpang

Nongpoh, Nailar 14: Ka tnad Textiles jong ka sorkar jylla mynta ka sngi kala rakhe ïaka 12th National Handloom Day 2026 ha Integrated Textiles Tourism Complex, Nongpoh ban ai ka jingïaroh ïaka jingtrei shitom jong ki nongthaiñ jaiñ kiba la ri bad sumar ban pynneh pynsah ïala ka kolshor tynrai naduh mynshuwa bad kawei pa kawei ka jaiñ bala thaiñ sani bha da ka kti ka don la ka jong ka jingïathuh khana naduh ka rukom pynwandur ïaki rong, ki dur kiba pyni ïaka jingriewspah ka jylla Meghalaya sha kiwei pat ki ri ka pyrthei bad ban pynlong ïa ka kam thaiñ jaiñ kum ka lad ioh kam bad pynim jakpoh ïaki longiing kiba bun.
Ha kane ka sngi u Myntri Rangbah ka jylla u Conrad K Sangma u la wan ban shim bynta kum u kongsan haka jingdonlang u Bah Metbah Lyngdoh Myntri ka tnad Textiles ka jylla, u Bah Mayral Born Syiem MLA ka Nongpoh, Kong Rona Khymdeit MDC, Dr. Shakil P. Ahammed Chief Secretary, u Bah Federick Kharkongor Principal Secretary, u Dr Abhishek Saini Deputy Commissioner ka Ri-Bhoi, u Giri Prasad Superintendent of Police, ka kong DP Tariang District Handloom Officer ka Ri-Bhoi lem bad kiwei kiwei ki heh ophisar ka jylla bad ka district.
Ha kane ka sngi naka liang u Myntri Rangbah ka jylla u la plie ruh ïaka iew pyninam jong ki nongthaiñ bapher bapher ka jylla bad kumjuh ruh ïaka Centre of Excellence naka bynta ki kam thaiñ bad wet bad naka liang ki khun samla ka jylla kila pyni ruh ïaka jingdait riam jong ki jaiñ Ryndia bad kumno kine ki jaiñ yn lah ban khring bad ban pynrung sha ki karkhana bapher bapher ki ri ka pyrthei kumba ki jaiñ Ryndia ki dei kiba pawnam haka jylla bad wat shabar.
Haba kren sha kane sngi naka liang u Conrad K Sangma u la ong ba ka jaiñ ryndia bad kiwei kiwei ki jaiñ thaiñ tynrai ba pynmih naka jylla kim dei tang ka jaiñ hynrei ki dei ki jinglong tynrai bad kyrpang jong ngi.
U la ong ruh ba kane ka dei ka jingsarong sha ka pyrthei bad lyngba kine ki jinglong kyrpang ki briew ki tip kaei ka jylla Meghalaya bad ngim dei ban klet ïaka tynrai kaba ngi wan namar naka jingwan ka jingstad saian bad ka tekhnoloji ngi kloi ban klet ïala ka tynrai kumba ka sorkar haki snem bala leit noh ki don ka jingkitkhlieh naduh ka ktien ka thylliej bad dei kane ka sorkar kaba la shim ïaka sienjam ban ithuh ïaka tkien khasi bad Garo kum ka ktien sorkar haka jylla.
Nalor ka kolshor bad ka tynrai kaba ngi wan, ka kamai kajih ka dei kaba kongsan, ha kaba sorkar kam wan ban pynkylla shimiet shimiet hynrei ka pynjanai ïa kaei kaba la don lypa laka dei ïa u shynrai lakadong, namar ban sdang thymmai ïa kiei kiei ka shim por da ki snem kumta ngi dei ban pynjanai ïakaei kaba don ban ai ka jinghikai kaba paka, ban rah ïaki nongsengkam shalor bad khamtam ban pynïoh ïa ka ïew kaba biang bad kumne la leh ruh ïa ki nongthaiñ jaiñ.