Thmu ka Sorkar Meghalaya ban buh noh da ka FCRA Cell ha ka jylla

Shillong, Nailar 13 : Ka Sorkar Jylla ka la shim rai ban buh ïa ka FCRA Cell hapoh ka tnad Kampohiing jong ka sorkar jylla, ban ïarap ïa ki seng bad ki kynhun bapher bapher ha ka jylla ha kaba ïadei bad ka jingaplai lane pynthymmai ïa ka Foreign Contribution Regulation Act (FCRA).
Haba kren bad ki lad pathai khubor ha kane ka sngi Palei, u Myntri Rangbah ka Jylla Conrad K Sangma u la ong ba ïa kane ka Cell yn sa buh da ka jingïakren bad ka Sorkar India namard ka jingthmu ka long ban pynsuk ïa ki jingeh jong ki kynhun hangne hi hapoh ka jylla, khlem da donkam ïa ki ban leit sha Delhi.
“Ka FCRA Cell kan ïarap ban pynïadei bad ka Sorkar India bad ban wad ïa ki lad ban pynbeit ïa ki jingeh kiba ki kynhun ki ïakynduh ha kaba ïadei bad ka jingpynthymmai bad ka jingaplai ïa ka FCRA,” u la ong.
Katkum ka jingong jong u, ki jingeh kiba ïadei bad kane kin lah ban ïakren bad pynbeit hangne ha Shillong, Tura ne Jowai, khlem da donkam ban leit sha ki jaka kum ka Delhi.
U Sangma u la ïathuh ruh ba ïa kane ka mat la dep ïakren bad u Home Secretary ka sorkar pdeng bad mynta ka sorkar ka dang trei ïa ka kam ha kaba ki ophisar jong ka Sorkar Pdeng kin ïadon bynta ban ai jingïarap ha ki por kiba donkam.
Shuh shuh u la ong ruh ba ka sorkar jylla kan shim hi ïa ka sienjam ban buh ïa ka FCRA Cell hapoh ka Home Department, bad lada donkam, yn lah ban buh ïa ki jaka treikam ha ki bynta bapher bapher jong ka jylla, khnang ban ïarap ïa ki kynhun ha ka jingaplai ne pynthymmai ïa ki FCRA license.
Ha kajuh ka por, u Myntri Rangbah u la kyntu ïa baroh ki seng saiñpyrthei ba kin klet noh ïa ka jingmyntoi saiñpyrthei halor kane ka mat, bad ban pynleit jingmut bad treilang ban wad ki lad ki lynti ban pynsuk ïa ki paidbah.
U la ong ba kane kam dei ka por ban ïaleh ïa ka jingïoh burom ne ban pynpaw mano ba u la leh ïa ka kam, hynrei ka dei ka por ban ïatreilang.