Da ka Resolution pyrshah tih Uranium mynjur ka Kynhun Myntri bad yn rah ha ka Dorbar Synrai

Shillong, Nailar 13 : Ka Kynhun Myntri ha ka sngi Palei ka la mynjur ïa ka Draft Resolution pyrshah ïa ka kam tih Uranium ha Meghalaya bad mynta ïa kane ka resolution yn wanrah ha ka Dorbar Synrai jong ka Iing Dorbar Thawain ka Jylla kaban sa long naduh ka 24tarik mynta u bnai.
U Myntri Rangbah ka jylla, Conrad K Sangma, u la ong ba ka nongrim jong ka Sorkar Meghalaya ka skhem, kata ba ka long pyrshah ïa kano kano ka kam kaba ïadei bad ka ishu uranium.
Haba kren bad ki lad pathai khubor hadien ka jingïalang jong ka Kynhun Myntri, u Myntri Rangbah u la ong ba ka draft resolution pyrshah ïa ka jingtih uranium ha Meghalaya ka la ïoh ïa ka jingmynjur da ka Kynhun Myntri bad kumta mynta ïa kane yn sa rah pat ha Iing Dorbar Thawain ka Jylla kaban sa long shen.
Ha kaba ïadei bad ka jingdawa jong ki kynhun kiba pyrshah ïa ka uranium ban khang noh ïa ka ophis treikam jong ka Atomic Minerals Directorate (AMD) ha Shillong, u Myntri Rangbah u la ong ba mynta ka jingpynleit jingmut jong ka Sorkar ka long ban rah shwa ïa ka resolution bad ban ïoh ïa ka jingmynjur jong ka Iing Dorbar Thawain ka Jylla.
“Kumba nga la ong, ka resolution ka long kaba shai bha ba ngi la kyrpad ïa ka Sorkar India ba kano kano ka jingtih ne kano kano ka kam kaba ïadei bad ka uranium, ym dei satia ban leh ha Meghalaya,” u la ong.
Shuh shuh u ong ba hadien ba ka Iing Dorbar ka la pdiang ïa ka Resolution, ka Sorkar Meghalaya kan shim ïa baroh ki sienjam kiba donkam ban pynthikna ba kano kano ka kam kaba ïadei bad ka ishu uranium kan ym don jaka ha ka jylla.