Uba ong ba dei ban siat beit ïa ki samla ba ïakhih ha Jantar mantar

Shillong, Nailar 11: U General Secretary jong ka BJP state Meghalaya u Bah Wankitbok Pohshna u la kyntait bad kiar bad um treh ban kren eiei ne ban kubur ruh halor ka jingleh bakla jong no jong no ruh kiba la pyndonkam bakla ïa ka Instagram account jong u President ka BJP Youth Wing u Samla Mewaker Lyngdoh Phawa kaba la pynmih ha ki rynsan khubor paidbah ne Social Media kaba la kynnoh ba u la ong ba dei ban shu siat beit ïa ki samla kiba ïakhih hapoh Jantar mantar halor ka jinglait tuh ki jingkylli ka NEET ha kine ki bnai ba la dep.
Haba kylli la ka BJP ka la ujor ejahar ne em ïa kito kiba pyndonkam bakla ïa ka Account u nongïashim ka BJP, u Bah Pohshna u la ong ba um don jingtip eiei halor kane ka jingjia bad ïaiban ruh ba ka BJP ka la dep ban pynshai halor kane ka jingjia.
Haba bteng ban kylli biang halor kane ka phang u Bah Pohshna u la kynriah noh na kane ka phang bad kynthoh jur ïa ka Congress bad u nongïalam jong ka u Rahul Gandhi ba ki la leh matlah bad thok beit markhmat ïa ki nongshong shnong ka Ri India halor ka jingshah thombor bad shah tied shah bom, shah siat lyer pynsat khmat ki samla ba ïakhih ha jylla Jharkhand ba la synshar da ka sorkar JJM hapoh ka jingïalam ka seng Indian National Congress.
Na ka liang utei u nongïalam ka BJP ula ong ba kane ka kam jong ka jingjia ba shah pyndonkam bakla ka account jong Samla Mewaker ka dei ka kam kaba rit ym dei ban pynleit jingmut than, hynrei dei ban phai pat sha ki kam ba la leh da u Rahul Gandhi bad ka seng Congress.
“Kane ka dei ka kam shimet kaba ngam kwah ban ong eiei bad kaba dei ruh ka kam kaba rit, hynrei ngin ïa pynleit jingmut ïa ki samla kiba ïakhih pyrshah ha Jharkhand pyrshah ka jingleh bakla ha ka thungkam thungjam,” ong u General Secretary ka BJP.