Pynksan ka ïingbishar HC ïa u Paiem Ainam pyrshah ïa ka jingshah sospon

Shillong, Nailar 12: U Paiem Ainam Manik Syiem hadien ba u la shah sospon ha ka Executive Committee ba la ïalam da ka Voice of the People Party ha Khasi Hills Autonomous District Council (KHADC), mynta ka sngi u la wan ban shimti biang kum u Syiem ba pura jong ka Hima Mylliem hadien ba ka ïing kashari kala rai jop ïa u.
Ïa u Paiem Ainam la pdiang sngewbha da ki Myntri bad ki Ba Khraw jong ka Hima Mylliem ha phalor jong ka ophis u Syiem ka Hima Mylliem ha Mawkhar ha shwa ba un leit ban shimti ïa ka khet Syiem.
Haba kren sha ki lad pathai khubor u Paiem Ainam Manik Syiem u la katkum ka hukum ba la pass mynta ka sngi hapoh High Court, na ka liang jong ka High Court ba don burom kala pynduh pyndam noh ïa baroh ki order ba sospon ïa nga kum u Syiem ba pura jong ka Hima Mylliem bad hadien kata na ka High Court kala thung biang ïa nga kum u Syiem ba pura kaba la pynmih mynta ka sngi.
“Hadien ba nga lah shimti biang kum u Syiem ba pura jong ka Hima Mylliem, nga kwah ban ïa trei lang hi bad ka District Council nangne sha khmat bad kino kino ki bor kiba halor kiba ngi hap ban ïa trei lang na ka por sha ka por” ong u Paiem Ainam.
Halor ka jingkynnoh bym siew ïa ka khajna, u Paiem Ainam u la ong ka Hima ka ju siew ïa ka share sha ka District Council bad phi tip hi ba ka 1/8 bynta ka dang dei tang ka house resolution kaba mih ha u snem 1953 bad kumba phi tip ba ka Resolution kam pat dei ka aiñ, u la ong.
“Wat la katta ngi burom beit ïa ka District Council na ka por sha ka por ban don ka jingiadei kaba jan hapdeng ka Hima bad District Council bad na ka liang jong ngi ruh kum ka burom ngi shait ai hi sha ka District Council kumba lah leh ki Syiem ha shwa jong nga” la ong u Paiem Ainam.
Shuh shuh u Paiem Ainam u la ong, “Kumba phi lah tip halor ka ILP la mynjur da ka Resolution hapoh ka ïing dorbar kila dep ban mynjur hynrei ka khlem pat long aiñ bad kane ka 1/8 share wat kam dei ka aiñ hynrei ngi burom ïa ka District Council na ka por sha ka por”.
Na ka liang jong nga, nga wkah ban don ka jingiatrei lang bad hooid ha ka jinglong briew ka don ka jingduna ka don ka jingbakla hangne hangtai namar ba ka jinglong jong ngi ki briew ym biang bad ki dang bun ki jingduna bad ngi kwah ban don ka jingiatrei kaba jan jong ngi bad ka KHADC ban lait na ka jingsngew pher jingmut, ong u Paiem Ainam.