Buh mawnongrim u MLA ha shnong Jakrem, artylli ki kam pynroi, ka skhim um bad surok

Mawkyrwat, Nailar 11: Ka long ka jingkyrkhu kaba khraw na ka bynta ka Shnong Jakrem baroh kawei ha kaba mynta sngi ba-ar jong ka taïew ka 11 tarik u ‘Nailar, 2026, kum ka shnong ka la ïoh ïa ki ar tylli ki kam pynroi lyngba ki skhim na ka sorkar jylla kiba long ka jingmyntoi bad jingdonkam jong ki paidbah, kawei na ki ka dei ka Jakrem A&B Water Supply Scheme ha ka jingmang pisa haduh ?15/- klur bad ka jingpynbha ïa ka surok ban ïaid sha Mawbasa ha ka jingmang pisa T. 1 klur tyngka hapoh ka State Scheme jong ka Sorkar Meghalaya.
Ïa kane ka jingbuh nongrim ïa ki ar tylli ki mawnongrim la plie da u Bah Renikton Lyngdoh Tongkhar, MLA ka Mawkyrwat Constituency bad Adviser sha ka Sorkar Meghalaya, Home (Police), ha ryngkat ka kong Aitinoli L. Mawlong, IAS, Deputy Commissioner, South West Khasi Hills District ha ka jingïadonlang ki heh ophisar jong ka Public Health Engineering Department (PHE), ka Executive Engineer ka PWD (Roads), Mawkyrwat Division ha ka jingïalang ba la pynlong ha madan Pyndenkseh, Jakrem.
Haba kren ha ka jingïalang shwa ban plie ïa ki mawnongrim, u Bah Renikton Lyngdoh Tongkhar, MLA ka Mawkyrwat Constituency bad Adviser sha ka Sorkar Meghalaya, Home (Police) u la pynpaw ka jingkmen kaba khraw ba kum kine ki jait prokram ban plie ar tylli ki kam pynroi ha ka juh ka jaka kim da u jia koit, ha kaba ïa kine yn sa ïoh ban pyntrei noh shen namar ba ïa ka mang tyngka ruh la dep ïoh.
Ym tangkata, u la pynkynmaw ruh ba ki skhim umbam umdih hapoh kane ka shnong Jakrem, ki la wan naduh ka por u (L) Rowel Lyngdoh u MLA ha ki snem kiba la leit noh bad kumjuh ruh ka skhim Jal Jeevan Mission (JJM), hynrei kine ki project kim shym la long satia kiba jop na ki daw ba bun. Namarkata, mynta ba ka tyllong um ka ban sa sdang shen ïa ka jingpyntrei ban pynpoi um ha kane ka shnong ka dei na ka Wah Rilang, “ngi kyrmen ba kane ka Jakrem A&B Water Supply Scheme kan long kaba jop bad kaba seisoh kumba ki paidbah jong ka shnong Jakrem ki la angnud”, ong u bah Renik.
U Bah Renikton haba kren ha kaba ïadei bad ka jingpynbha bad siangrong ïa ka surok lyngba ka tnad PWD (Roads) u la pynpaw ka jingkmen halor ka jingïoh jong kane ka shnong ïa ka surok ban leit sha Mawbasa. Kumta u ai khublei ïa ka sorkar MDA kaba la mang mynta haduh 20 tylli ki jait jingmang na ka bynta ki kam pynroi tang ha u bnai Lber, bad ki skhim umbam umdih kiba bun ha ki shnong bapher bapher hapoh ka Mawkyrwat Constituency.
Kiwei de kiba la ïadonlang ki long u Bah R.S. Nongbri, Chief Engineer, PHE Meghalaya, Shillong, u bah Joel P. Marbaniang, Executive Engineer ka PWD (Roads), Mawkyrwat Division, u Bah K. Khonglah, Additional Chief Engineer, PHE Zone III, Shillong, u Bah L. Dhar, Superintending Engineer, PHE Western Circle, Nongstoin, bad u Bah K. Nongbsaw, Executive Engineer, PHE Mawkyrwat Division, ki SDO jong ka PWD (Roads) bad PHE Mawkyrwat Division ha ryngkat ki nongshong shnong, kynthup ïa u Bah Pascal Wahlang, Rangbah Shnong Jakrem.
Kiwei de ki program kyrpang ha kane ka sngi ki long ka jingrwai pdiang na ka Church of God Secondary School, Jakrem, bad ka jingshad na ki khynnah skul jong ka Lumtyngun Secondary School, Jakrem, ha kaba ïa ka jingïalang la pynïaid da u Bah Ailadstar Nongrem bad jingkren khublei na u Bah Marshan Lyngdoh.