Mairang, Nailar 11: Ka Deputy Commissioner (Supply) jong ka Eastern West Khasi Hills district ka la pyntip sha baroh ba ïa u khaw uba dei na ka bynta u bnai Nailar 2026 la pyllait ki dukan khaw reshon kiba don hapoh ka distrik. Utei u khaw reshon ba la pyllait u dei na ka bynta ki long ïng kiba hap hapoh ka PHH, AAY, bad Non NFSA kat kum ki kyndon jong ka National Food Security Act 2013. La pyntip ruh ba ka jingsam ïa u khaw ka long kat kum ka jingbthah kata ïa u khaw PHH ka jingsam kan long mar san kilo shi khlieh briew bad ym donkam ban siew pisa. Ïa u khaw AAY -pat ban sam mar 35 kilo kawei ka card khlem da siew pisa katba ïa u khaw Non NFSA pat dei ban sam mar 7.205 kilo kawei ka card ha ka dor 13 tyngka shi kilo.
Ka Deputy Commissioner (Supply) ka la mana ruh ïa baroh ki dukan reshon ba kim bit ban ai duna ïu khaw kumba la mang da ka sorkar lane ban ot kilo na ka bhah ba la mang lyngba ka skhim NFSA bad Non NFSA. La bthah ruh ïa baroh ki fairprice shop dealer lane ki nongsam khaw reshon ba kim dei ban pynduh khaw ïa ki nongbam wat lada kim pat don Adhaar card ruh bad na ka bynta kito kiba la kum pynjah ïa ki reshon card la bthah ba kin dei ban wan pan jingbit na ophis jong u Deputy Commisioner (Supply) Eastern West Khasi hills district bad ban sam pyndep ïa u khaw shuwa ka 31 tarik Nailar bad ha ka por ba ki sam ïa u khaw ki dei ban pyndonkam da ka e POS mashin da kaba leh da ka online mode.
La maham ruh ba lada don kino kino kiba pynkheiñ ïa kitei ki jingbthah kin shah ha ka jingpynshitom katkum ka Meghalaya Food grains & SK oil Control Order 2022.
