Nongstoiñ, Nailar 11: Ha kawei ka jingjia kaba la jia mynta ka sngi ha ka thaiñ Nongstoiñ West Khasi Hills District, ar ngut ki samla ki la khlad noh hashen hadien ka jingjia pom pyrthat kaba la jia ha madan phutbol ha ka shnong Mawsngapwir.
U Superintendent of Police ka West Khasi Hills u la ïathuh ba kane ka jingjia ka la jia ha ka por kumba 3 baje ei ei nohphai sngi, katba ka jingïalehkai phutbol ka dang ïaid shakhmat ha madan jong katei ka shnong.
U SP u la ïathuh ba kine kiba la khlad noh hashen hadien ka jingpom pyrthat, ki dei kiba la tip kyrteng u Mickson Kshiar 18 snem ka karta bad u Cleverson Kshiar 19 snem ka karta kiba shong ba sah ha ka shnong Lawrapha. La ong ba kine ki ar ngut ki dei ruh ki rang ïalehkai kiba la khlad kyndit noh hapdeng ba dang ïaid ka jingïalehkai ha madan.
Shuh shuh, u SP u la ïathuh ruh ba ki don sa kumba phra ngut ei ei ki briew, kynthup lang ïa ki nongpynïaid ïa ka jingïalehkai, kiba la mynsaw na ka jingpom kyndit u pyrthat. Ïa kine baroh phra ngut la pynkit noh mar mar sha Civil Hospital Nongstoiñ bad ha St Joseph Hospital Nongstoiñ na ka bynta ban ïoh ki jingsumar.
