Na ki 2313 tylli ki laisen FCRA ha NE, ha Meghalaya ki don sa tang 70 tylli kiba bun la shah pynduh noh: MPCC

Shillong, Nailar 10: Ka Party Congress ha Meghalaya ka la pynlong ïa ka jingïaid paidbah ban pyrshah ïa ka “Foreign Contribution Regulation Bill, 2026 na madan Fire Bridge sha Don Bosco square ha kaba bun bah ki briew kila wan ban shim bynta ha kane ka jingïaid paidbah.
Haba kren ha ka jingïalang u President ka Meghalaya Pradesh Congress Committee u Bah Vincent H Pala ba dei MP barim na 1-Shillong Parliamentry (ST) Constituency ba dei ruh u Myntri Khynnah ka sorkar jong ka Congress u la pynshai paidbah ha kaba ïadei bad kane ka aiñ Foreign Contribution Regulation Act, ïa kaba ka sorkar BJP mynta ka kwah ban pynkylla ïa kane ka aiñ.
U Bah Pala la ong ba, balei kane ka bill ka long kaba sniewtam, ka long lada don kano kano ka ïingmane kaba ïoh jingïarap na ki bor kiba nabar, na America ne na Germany bad nawei nawei ruh, lane da don ki skul kiba ïoh jingïarap ne ki hospital kiba ïoh jingïarap, ki seng treimon sngewbha kiba ïarap ai kam ai jam ban pynbha ïa ki skul ne kino kino ban ïarap ïa kiba duk ne ki khunswet, ka long uno uno u ba kwah ban ïoh jingïarap nabar hap don ka Laisen.
Kane ka laisen ka ïarap ïa ki briew ha ka Ri India, mynshuwa ki don palat sanphew hajar tylli ki laisen hynrei mynta bad mynta ki don sa tang khatsaw hajar tylli hadien ba ki la shah pynduhnoh, bad na kine khatsaw hajar tylli la kumno kumno 2313 ki dei na North east India bad na kine ha Meghalaya kiba dang trei kam ki don sa 70 tylli.
U Bah Pala u la ong ba balei ki hap ban ïa pyrshah, ka long ba lada ki shna ïa ka ïingmane kaba shiklur, lada ïoh ïa ka jingïarap kaba tang shiphew lak tyngka na sha bar kin shim noh ïa ka ïingmane lada ym lah ban pynbiang ïa ki jingdonkam, lane ki skul, ki hospital, kino kino ki jaka ai jinghikai ïa kiba duk, da ka jingpynkhreh ka BJP ïa kane ka Bill baroh kine ki don ha ka jingma.
Ha kane ka Bill ki la pynrung ïa kawei ka kyndon, lada ym lah ban pynbiang ïa ki kot ki sla, lane ka FCRA laisen ka shah pynduh ka sorkar kan shim noh ïa ki jaka puta kiba la ïoh pisa lyngba ka FCRA, lane ym lah ban pynthymmai lane sangehnoh, katkum kane ka bill kin buh ïa kawei ka bor ban shim noh, bun ki skul mynta ki ïoh jingïarap, lada pynsangeh kan kiew ka bai skul, kan kiew ka bai hospital.
Kane ka FCRA kam dei tang na ka bynta ka party Congress, hynrei ka dei na ka bynta ka jingmyntoi jong ki paidbah, ka BJP ka la ong ba kane ka bill kan long nangne shakhmat ka ban ym ktah ïa ki jingtreikam ki kynhun, hynrei ka jingkyrduh kam ïa ki samla kan dang jur nangne shakhmat dei na kane ka daw ba donkam ïa ka jingïarap na shabar, kane kam dei na ka bynta ka seng Congress, na ka liang ka party ka kren shai lada don kiba pyndonkam bakla ïa ka pisa ba wan na ka FCRA yn pynshitom ïa ki.