SHILLONG, Nailar 10: Ka Tynring SC, Lawsohtun SC bad ka Sohryngkham SC ki la ïoh ban khur pura lai point hynne ka sngi Nyngkong hadien ba ki la jop ïa la ki jong ki jingïakhun jong ka lympung Second Division Football league 2026, ba la pynïaid da ka Shillong Sports Association ha Polo.
Ka Tynring SC ka la pynliem da 2-1 ïa ka Sohiong SC, nangta ka Lawsohtun SC ka la jop da 2-0 ïa ka Jongksha SC, bad khatduh ka Sohryngkham SC ka la pynliem noh da 2-1 kol ïa ka Umrynjah SC.
Ha SSA Ground, ka Tynring ka la ïoh ban lamkhmat na ka kol jong u Babiangdor Khyriem (46’) hynrei ka Sohiong ka la pynïakhaid shipor na u Albert Malngiang (63’), shuwa ba u Rahbor Baino (86’) un thep ïa ka namtam na ka bynta ka Tynring.
Ha kajuh ka por ka jingïakhun ha MFA Ground, la sakhi ïa u Mewan Rasmut (11 & 20’) uba la pynkhihjar ar sien ban rai ïa ka jingjop na ka bynta ka Lawsohtun pyrshah ïa ka Jongksha.
Ka jingïalehkai ba khatduh ha SSA Ground, ka Sohryngkham ka la thep ar tylli ki kol lyngba u Bankynshew Warjri (6’) bad u Winstar Kharpraw (25’), katba u Wanborlang Nongbri (12’) u la pynïakhaid shipor na ka bynta ka Umrynjah.
