1300 klur tyngka shisnem ïohnong ka Meghalaya na ka kam jngohkai pyrthei: Dy.CM

Shillong, Nailar 9 : U Symbud Myntri Rangbah ka jylla u ma Sniawbhalang Dhar u la ong ba ka sorkar MDA hapoh ka jingïalam ka NPP ka la kyntiew bha ïa ka kam jngohkai, ïa ki surok lynti syngkieng , ïa ki kam ïalehkai sport bad kiwei kiwei ki bynta ruh namar ka kwah ban ïohi ïa ka jingkiew bad jingroi jingpar jongka jylla.
Ka jingkyntiew ïa ka kam ïalehkai sport ka dei halor ka nongrim ban ïarap ïa ki khun samla ba kin lait na ki jingpynshoi ba bun jait khamtam ban lait na u drok uba la jyllei palat haduh katta katta ha kane ka jylla bad ka thaiñ shatei lam mihngi baroh kawei.
ïa kane u la kren ha ka jingïalap election na ka bynta u kyrtong MP ka NPP ha kane ka election shiteng samoi sha ka ïing Dorbar Thawaiñ Lok Sabha u Dr DRL Nonglait kaba la long ha Rymbai, East Jaintia Hills ha ka Sngi Palei. U ma Sniawbha u la ong ba ka jylla ka la ïoh jingmyntoi bha na ka kam jngohkai pyrthei namar ka la ïoh nong bha ha kine ki phra snem ba la leit noh.
Mynshwa ka mang tyngka jongka tnad Tourism ka long tang 40 haduh 50 klur tyngka mynta pat ka la kot sha ka 1000 klur tyngka. Kat kum ka jingkheiñ ba la ïoh na ka khyrdop Umling la pyni ba ki nongwan jngohkai sha ka jylla ha ka shisngi kim duna ïa ki 7000-8000 tylli ki kali.
Kata ka mut ym duna ïa ka 32,000 ngut ki nongwan jngohkai ha ka shisngi. lada uwei uwei u pynlut tang 1000 tyngka shisngi ka mut la ïoh 3.20 klur ha ka shisngi bad lada shisnem ka la kot sha ka 1300 klur tyngka. Kane ka dei a pisa kaba wan rung beit beit sha ka jylla Meghalaya.
U la ong ki Homestays ruh ki la nang kiew na ak 500 sha ka 5000 tylli bad kane ka dei namar ka jingai subsidy jongka sorkar ïa kito kiba seng ïa kine ki home stay.
Halor ki surok,ki lynti ki syngkien u la ong 11000 klur tyngka la pyllut na ka pisa jongka jylla ha kine ki phara snem na ka bynta ban pynbha haduh 3100 Km ki surok kiba la don lypa bad ban shna thymmai kumba 1600km ki surok.
` U la ïathuh la mang ruh 21,000 klur tyngka na ka bynta ban pynheh ïa ka surok naduh Lad Umroi shaduh Rattacherra bad kane ka projek ka dei beit na u Myntri Rangbah duh ka ri India.
Ha ka liang ka sport ula ong ka sorkar ka la kyntiew bha khamtam ha ka kam ïaleh phutbol khnang ba ki khun samla kin lait na kiba bun ki jingsniew.
Dei na kata ka daw ba ka Meghalaya ka la paw bha ha kylleng ka ri India ha ka liang ka phutbol namar ka sorkar ka kyntiew bha ïa kane ka kam ïalehkai ban pyllait ïa ki samla na ki jingsniew jongu drok. U la ïathuh ruh ïa ka jingtei ba 732 klur tyngka ïa ka Stadium ha Mawkhanu. U la ong wat ka FIFA ruh ka la ithuh ïa ka nongbah Shillong bad ha u snem 2025 ma u bad u Myntri Rangbah ki la ïa kynduh ïa u President ka FIFA ha Mumbai.
U la kyntu ïa ki paidbah ba kin jied ïa ka NPP namar ka dei ka party kaba trei bad khnang ba kan dang lah ban trei shuh shuh u kyntu ïa ki paidbah ban jied bad pynjop don burom ïa u kyrtong jongka u Dr Nonglait ba un ïoh ban ïasaid na ka bynta ka jylla hapoh Parliament.