Phah dorkhas u MP Tura sha u myntri ka koit ka khiah ban kyntiew kyrdan ïa ki PHC sha ki CHC

Shillong, Nailar 09: Da kaba sngewkhia, u MP ka Tura u Saleng A. Sangma dangshen u la aiti ïa ka dorkhas jingpynkynmaw sha u Myntri ka sorkar pdeng uba khmih ïa ka tnat Health and Family Welfare u JP Nadda, ha kaba u la banjur ïa ka jingdonkam ka jingkyrshan jong ka sorkar pdeng ban pynkhlaiñ ïa ki jingtei ha kaba ïadei bad ki lad jingsumar hapoh ka jylla Meghalaya.
U la ong ba hadien ka Ïing dorbar thaw aiñ ka ri, hadien ka jingïakren bad u myntri ka sorkar pdeng, dalade u Sangma u la aiti ïa ka dorkhas kaba pynpaw ïa ka jingthylli kaba la slem hapoh ki lad ai jingsumar jong ka jylla bad u la khot ruh ïa ka jingtuklar kaba donkam mardor.
Shuh shuh u la pynpaw ba ki mat ba hakhmat jingdawa hapoh ka dorkhas ki kynthup ïa ka jingthaw ïa ki artylli ki additional medical college ha Meghalaya khnang ban lah ban pynbeit ïa ki jingduna ki doktor bad kumjuh ruh ki medical seat. U MP u la pan ruh ka jingïarap ban kyntiew kyrdan ïa baroh ki Primary Health Centre sha ka Community Health Centre da ka jingdon kaba biang jong ki nongtrei ha ka koit ka khiah bad ki jingdon ki lad kiba kongsan.
Na ka liang u Sangma u la kyrpad ba baroh ki Civil Hospital ha manla ki district dei ban pynkhlaiñ bad ban don ki tiar katkum ka juk kaba mynta bad kumjuh ruh ki dawai kiba biang. U la banjur ban kyntiew ïa ki jingkhmih bniah diagnostic bad ki jingkot bor ki lad sumar ha ki hospital ba don ha ki district khnang ba ki nongpang kim donkam ban leit shabar jong ki district jong ki ban ïoh ki lad jingsumar.
U MP ka Tura u la ong ba kane ka dorkhas ka long kum ka jingpynkynmaw halor ka jingdonkam kaba kongsan ki lad jingsumar kiba biang ha kylleng jong ka jylla.
U Sangma u la bynrap da kaba ong ba u long uba sngewkhia ban rah ïa ki jingeh haba ïadei bad ki kam ai jingsumar hapoh ka jylla Meghalaya khnang ba ka sorkar pdeng kan ïarap halor kine ki jingdonkam kiba kyrkieh bad kiba long kiba kongsan bha hapoh kane ka jylla.