Phaikhmat sha ka Mental Health bad ka jingma Cyber crime ki Influencer

Shillong, Nailar 09: Ka Datayug Society, kaba la sdang ban pynïaid ïa ki prokram pynsngewthuh paidbah halor ka cybercrime bad Cyber Safety (CS) naduh u Jylliew 2023, ka la pynïar mynta ïa ka jingtreikam jong ka sha ki social media influencer bad content creator, khamtam ban pynsngewthuh ïa ki halor ka jingma na ki online scam, ka jingshah ktah ha ka mental health bad kiwei pat ki jingeh kiba mih na ka jingpyndonkam ïa ki rynsan social media.
Haba kren sha ki lad pathai khubor ha ka Influencers Meet 2026 ha Shillong, ka Menoka, Founder bad President ka Datayug Society, ka la ïathuh ba ïa kane ka seng la sdang ha u Jylliew 2023 da ka thong kaba skhem ban kyntiew ïa ka jingtip bad jingsngewthuh halor ka cyber safety, khamtam hapdeng ki samla.
Ka la ïathuh ba naduh ba la sdang ïa kane ka jingïaid lynti, ka Datayug Society ka la pynlong bun tylli ki prokram pynsngewthuh ha ki skul bad kolej bapher bapher, bad haduh mynta ka la lah ban poi sha palat 20,000 ngut ki khynnah bad samla pule ha kylleng ka Meghalaya ban ai jingtip halor ka cybercrime, online fraud bad ka rukom pyndonkam ïa ki rynsan digital da kaba shngaiñ.
Katba nang ïaid ka por, ka Menoka ka la ong ba ka seng ka la sngewthuh ba ym tang ki khynnah skul bad kolej kiba donkam ïa ka jingtip halor ka cyber safety, hynrei ki social media influencer bad content creator ruh ki ïakynduh ïa bun ki jingeh kiba donkam ban shah pynsngewthuh bad ïarap.
Ka la ong ba shuwa ban wanrah ïa ka jingmut ban pynlong ïa ka Influencers Meet, kam shym la pyrkhat tang kum ka President jong ka Datayug Society, hynrei ka la pyrshang ban buh ïalade ha ka jaka jong ki influencer ban sngewthuh ïa ki jingeh kiba ki ïakynduh man ka sngi.
Ka Jingbeh Likes Bad Views Ka Lah Ban Ktah Ïa Ka Mental Health. Kawei na ki mat kiba ka Menoka ka la pynpaw ka long halor ka mental health jong ki influencer bad content creator. Ka la ong ba bun ki samla kiba pynlut por bad trei shitom ban shna ïa ki video bad content, hynrei haba kim ïoh ïa ka jingbun likes, views ne engagement katba ki khmih lynti, kane ka lah ban wanrah ïa ka jingsngewsih, jingduh jingkyrmen bad jingshah ktah ha ka jingmut jingpyrkhat.
Ka la pynpaw ba ka jingkiew ne jinghiar jong ki likes bad views kam dei ban long ka daw kaba pynïaid ïa ka jingim jong ki content creator. Ki influencer ki donkam ban long kiba skhem ha ka jingmut jingpyrkhat bad ban sngewthuh ba ka dor jong ka jingim jong ki kam shong tang ha ka jingbun ki followers, likes ne views ha social media.
Da kaba sngewthuh ïa kane ka jingeh, ka Datayug Society ka la ïatreilang bad ka U-MATTER, kaba trei halor ka mental health, khnang ban wanrah ruh ïa ka bynta jong ka jingkoit jingkhiah ka jingmut jingpyrkhat hapoh kane ka prokram.
Ki Influencer Ruh Ki Lah Ban Shah Scam: Ka Menoka ka la maham ruh ba ki social media influencer kim lait na ka jingshah thok ne online scam.
Ka la ong ba ki don ki briew kiba lah ban wan sha ki influencer da ki jingtyrwa kiba i kumba ki dei ki brand promotion, advertisement ne ki lad ban pynbun followers, likes bad views, hynrei ha kaba kut ki lah ban long ki buit thok ban shim pisa.
Ka la kdew ba bun na ki influencer ha Meghalaya ki dei ki samla kiba dang sdang ïa ka jingïaid lynti jong ki bad kim pat don pisa bun ban pynlut ha ki advertisement. Bun na ki ki shaniah ha ka organic growth ban kyntiew ïa ki page bad account jong ki.
Namarkata, haba don kiba tyrwa ba kin pynbun followers, likes ne views da kaba siew pisa, ki samla content creator ki lah ban shah pynngop suk ha kum kine ki jingtyrwa.
Ka la kyntu ïa ki influencer ba kim dei ban shu ngeit ïa kino kino ki jingtyrwa kiba wan lyngba social media, hynrei ki dei ban tohkit bad pynthikna bha shuwa ban siew pisa, ai personal information ne banking details.
Ka Menoka ka la ong ba kawei pat ka jingthmu jong ka Influencers Meet ka long ban wanrah lang ïa ki content creator ha kawei ka rynsan, khnang ba kin ïasam ïa ki jingshem, ki sap bad ki jingtip halor ka rukom shna content.
Ka la pynpaw ba ka jingïasam jingtip hapdeng ki influencer kan ïarap ïa ki ban nang pynbha ïa ka rukom shna video, ka digital marketing bad ka rukom pyndonkam hok ïa ki social media platform.
Ka Influencers Meet 2026 la pynlong lang da ka Datayug Society, U-MATTER, VoxImpact by VoxCrest Media bad ka Meghalaya AIDS Control Society (MACS), da kaba wanrah lang ïa ki social media influencer, content creator bad ki riew paidbah na ki bynta bapher bapher.
Ka thong jong kane ka jingïalang ka long ban kyntiew ïa ka jingpyndonkam kaba don jingkitkhlieh ïa ki digital platform bad ban pynshlur ïa ki influencer ba kin pyndonkam ïa ka bor jingktah jong ki na ka bynta ka jingbha jong ka imlang sahlang.
Ka Menoka ka la pynpaw ruh ïa ka jingkmen ba ki kynhun bapher bapher kiba trei ha ka mental health, cyber safety, digital marketing bad social awareness ki la wan ïatreilang hapoh kawei ka rynsan.
Ka la pynpaw ïa ka jingkyrmen ba kane ka jingïatreilang kan ym kut tang ha ka Influencers Meet, hynrei kan plie lad ïa ki influencer ba kin nang shim bynta ha ki kam pynsngewthuh paidbah lyngba ki content jong ki.
Ki mat kiba lah ban pynphriang jingtip lyngba ki influencer ki kynthup ïa ka HIV/AIDS awareness, mental health, cyber safety bad ka responsible digital content creation.
Lyngba kane, ka Datayug Society ka kwah ban pynshlur ïa ki influencer ba kin ym pyndonkam ïa ka social media tang na ka bynta ka jingsngewbha ne ban kyntiew ïa la ka jong ka page, hynrei ba kin pyndonkam ruh ïa ka bor jingktah jong ki ban pynphriang ïa ka jingtip kaba dei, ban ïada ïa kiwei na ki jingma online bad ban wanrah ïa ka jingkylla kaba bha hapoh ka imlang sahlang.