Mana u DC Ri Bhoi ïa ki trok ba ïeng klumar harud surok bad ki jingpynïeng ïa ki jingtei be-aiñ

Nongpoh, Nailar 09: U District Magistrate ka Ri-Bhoi District, Dr. Abhishek Saini, u la pynmih da ka hukum ban khang pyrshah ïa ka jingtei beaiñ bym ithuh ithaw bad ka jingpynïeng khlem jingbit ïa ki trok, ki kali kit mar bad kiwei kiwei ki kali harud ki bynta jong ki National Highway kiba hap hapoh ka Ri-Bhoi District.
Kane ka hukum ka kynthup ïa ki bynta jong ka NH-6, NH-37 Old (New NH-27), Umsning Bypass bad Shillong Bypass, kiba sdang na Khanapara, Jorabat, Umiam haduh Lumdiengngan.
Ki National Highway ki dei ki lynti kiba kongsan bha na ka bynta ka leit ka wan jong ki paidbah bad ka kit ka bah jong ki mar. Ka jingdon jong kino kino ki jingtei laitlan ne ki kali kiba pynïeng khlem jingbit harud jong ki surok ka lah ban pynwit ïa ka leit ka wan bad buh jingma ïa ka jingshngaiñ jong ki nongpyndonkam surok.
Kumta naka liang ka bor district ka la pyntip ba la lap ïa ki jingtei khlem jingbit ha ki katto katne ki jaka harud kine ki National Highway. Kine ki jingtei, katkum ka hukum, ki lah ban pynwit ïa ka jingïaid beit jong ki kali, kaba lah ban buh jingma bad wanrah ïaki jingjia aksiden bad kumjuh ruh ka jingieng jkulmar jong ki trok ka buh jingma ïaka jingshngaiñ haka leit ka wan khamtam haka por miet.
Na ka bynta ban tehlakam ïa kine ki jingeh, u District Magistrate ka Ri-Bhoi u la pynmih da ka hukum ba la khang pyrshah ïa ki jingtei ha shilynter u surok National Highway bad ka jingpynïeng khlem jingbit ïa ki trok, ki kali heh bad kiwei ki kali harud kine ki bynta jong ki National Highway lait noh haki jaka ieng kali bala ithuh kyrpang.
Kino kino kiba pynkheiñ ïa kane ka hukum kin ngat haki kyndon aiñ jong ka Bharatiya Nyaya Sanhita (BNS), 2023, ryngkat bad kiwei ki kyndon jong ka aiñ bad kane ka hukum kan treikam tad haudh ban da pynbna da kumwei.