Ka seng shitniam RSS kaba khlem register, khlem jingkheiñ jingdiah kumno poi pisa ha ka, kan lait na ka FCRA?.

Ka jingïakren ha kine ki sngi, ka jubor bha, halor ka aiñ Foreign Contribution Regulation Act (FCRA), namar ba ka sorkar BJP, kaba synshar ïa ka India, ka thmu ban pynkylla ïa ki kyndon jong katei ka aiñ bad ki don shibun ki kyndon, kiba don jingthmu ban tehlakam ïa ki seng niam, kiba theh jingïarap ïa ki duk ki suk bad ki rangli bad na shibun ki kyndon, ki don khyndiat kiba takra bad ki ba eh bha bad kita ki long (i) kano kano ka seng, kaba la ïoh jingïarap tang hapoh T.10 lak na shabar ri, kin duh noh ïa ki jingïoh jingïarap nangne shakhmat (ii) ka sorkar India, ka don ïa ka bor ban kurup noh ïa ki jingdon jingem, lada ka dei ïa ki jingtei nam, kum ïa ki jaka jingïarap, ki skul lane ki Ïingmane kiba la bei pisa na ki kynhun kiba na shabar ri.
Kane ka mat, ka dei kaba jwat bha ban ïakren bad khyndiat tylli ki jingshisha, ki long ba ki don ki sengbhalang, kiba treikam ha kylleng ka pyrthei bad kitei ki kynthup ïa ka Lions Club, ka Rotary Club bad kine ki ju bei jingïarap sha kiba donkam, lyngba ka jingïasynniang jong ki para dkhot na kylleng pyrthei.
Nangta don sa ki Bank, ki kompeni, ha kaba kiba bun na ki kompeni kiba treikam ha India, ki dei kiba la long trai da ki heh spah, kiba na United Kingdom, United States, Germany bad kiwei de ki Ri bad kitei ruh ki don ïa la ka jong ka bhah jong ki, na ka bynta ki kam ïarap ïa kiba shem lanot.
Ha India, ka don ka jaka sumar ïa ki khun shempap, kum ka Ïing ka Mother Teresa ha Kolkata bad katei kam ju ïoh eiei na ka sorkar jylla ne na ka sorkar India, hynrei ka sei ïa ki jingïarap sha kitei ki kutlad bad kam dei tang kata, hynrei ki don bun bah ki jaka ri khunswet, ki hospital, ki jaka ri tymmen bad kiwei de kiba ju kyrshan dalade bad da ka jingsngewlem jong ki riew shimet lane ki kynhun kiba na satlak pyrthei.
Ka jingthmu jong ka sorkar BJP, ban pynkylla ïa ka aiñ jong ka FCRA, ka long kumba kan buh da ka shang khawiah ïa ki seng niam bapher, ki sengbhalang bad wat ki kynhun treikam kiba don jingïasnoh bad ki kompeni kiba nabar, lada dei ka twitter, ka youtube bad sa kiwei kiwei.
Ka seng shitniam Hindu, ka RSS, ka dei ka seng ka bym shym la register satia ha ka sorkar India, hynrei ka trei ïa bun bah ki kam ïarap bapher bapher bad ka don ruh ïa ki shnat jong ka ha kylleng pyrthei bad lada ka long kumta, ka jingkylli ka mih ba kumno ka poi ka pisa sha katei ka seng, kaba khlem don jingkheiñ jingdiah satia.
Ka United States of America, ka la kren pyrshah jur halor ka jingthmu ban pyntreikam ïa katei ka aiñ bad lada ka India, kan ïaid shakhmat, kumta kan buh shibun bah ki mawjynthut ha ka jingïadei jong ka bad kiwei pat ki ri kiba bun, kiba dei ki ri Khristan. Ha kane ka jingeh bad ka hiran jong ka pyrthei, ka India, ka donkam shibun ki paralok, ym ki nongshun bad lada ka sorkar BJP, ka ïaid bakla, kumta kan lah ban khanglad ïa ki Khristan ha India, hynrei kan long dieng pyngkiang ïalade ha ka jingïadei jong ka bad ki phew tylli ki ri jong ka pyrthei.
Hynrei namarba ka jingmyntoi saiñ pyrthei hapoh kane ka ri ne ïoh lehse ka lah ban dei na ka jingthmu ne ka jingshah kynshoit jong kiwei pat ki kynhun kiba bishni naba ïalade ruh kim lah ban kner ïa ki lad jingshakri kiba kwah ba ka Sorkar Pdeng kadei ban khanglad syndon hynrei ym dei tang ka jingkhanglad hynrei kaba kham sniew shuh shuh pat ka long ban shu kurup bad ban shu knieh ei ne kam jubor ïa ki jingdon jingem bad ki shlem treikam jong ki kynhun ai jingshakri lad kim lah bad ki bakla ruh wat tang shi sekon ban pyndep pura ïa ki kyndon kiba don hapoh ka Foreign Contribution Regulation Act.
Namar ba ha India kiba bun paid ne kiba bun na ki nongshong shnong ki dei ki riewngeit Hindu bad ba kidei ruh kiba la pynjop bad ai jingkyrshan bha ïa ka BJP la ka dei ha ki elekshon Legislative Assembly ne ki Member of Parliament kumta ka BJP kan pyrshang beit ban pynurlong ïa kane ka jingthmu khnang ba kan nang lah ban ïoh bat ïa u lakam synshar ha kawei pat ka samoi treikam ka ban dang wan bad ïa kane ka aiñ ka long kaba suk bha ban ïoh jingmynjur naba ka BJP ka la long lypa kaba bun paid hapoh baroh artylli ki Ïingdorbar Thaw Aiñ jong ka Ri, kata hapoh Lok Sabha bad Rajya Sabha bad ka donkam ruh tang 10% ka jingmynjur ne ka jingïarah kti jong ki dkhot ka lah biang ba kan ïoh jingmynjur, hynrei watla ka lah ban long haduh katne, ka jingkyrmen ka lah ban wan biang pat hadien jong ka elekshon ka ban long ha u snem 2029 sha ka Dorbar Thaw ain ka Lok Sabha lada ka BJP kan duh noh ïa ka jingjop ba bun paid bad ba yn ïoh bat noh da kiwei ki seng saiñ pyrthei ïa u lakam synshar hapoh ka sorkar pdeng, kaba lah ban pyndam biang ïa kane ka Bill ne ka aiñ FCRA kaba lah ban wanrah jingpynkylla da ka Sorkar National Democratic Alliance (NDA) hapoh ka jingïalam ka seng BJP.