Ryngkat ka hukum ban pynkhlaiñ bor pahara shah ka ïingbishar HC ban ïaid Yatra ki Hindu sha Mawjymbuiñ

Shillong, Nailar 8 : Ka ïing Bishar High Court ka jylla ha ka Sngi Thohdieng ka la shah ban pynlong ïa ka jingïaid Yatra ha ka 9 tarik Nailar sha krem Mawjymbuiñ, Mawsynram, bad bthah ïa ki bor district ka East Khasi Hills ban pynthikna ban pynkhlaiñ ia ki bor pahara ban don ka jingshngaiñ bad jingïaid beit kat kum ka Standard Operating Procedure u snem 2025.
U Justice HS Thangkhiew ula pynmih ïa kane ka hukum haba bishar ïa ka WP(C) No. 275 u snem 2024 hadien ba ka ïing Bishar ha ka 5 tarik Nailar, ka la bthah ïa ki bor district ba kin pyntip la ki lah ka long ban ai jingbit ïa ka Yatra.
Halor kane, u Deputy Commissioner Abhilash Baranwal ula pynlong ïa ka jingïalang ha ka 6 tarik Nailar bad ki bor Pulit lem bad ki nongtrei na Block, ïa kaba ïa ki mat jingïakren la wanrah hakhmat ka ïing Bishar.
U Superintendent of Police ula pyntip ha ka jingïalang ba u lah ban pynbiang ïa ka bor pahara kaba biang lada ki nongpyn ïaid ki bud ia ka SOP 2025.
U BDO ka Mawsynram, ula aiti ïa ka shithi na u Rangbah Shnong ba pyntip ba katba ki Nongshong shnong ki la rai ban nym ailad ïa kano kano ka jinglehniam hapoh ka krem, ki long pat kiba kloi ban pdiang ïa baroh ki nongwankai da ka burom kam pher ki dei na kano kano ka jaidbynriew ne ka niam.
U nongïasaid aiñ ki nongmudui ula pynpaw ba ki pdiang ïa ka nongrim ïatreilang jong ka Jylla bad ka Dorbar Shnong bad kyrpad pat ban shah ïa ki Yatra ba kin theh um malu mala kum ka dak ka jingburom, kumba la pynpaw ha ka hukum ba hashuwa.
Haba buh jingthoh ïa ka jingïakren bad ka kaiphod ki pulit, ka ïing Bishar kala ong ba kane ka Yatra ka lah ban ïaid shakhmat ha ka 9 tarik Nailar.
Kala hukum ba dei ban shah ban rung shapoh ka krem na ka bynta ki nongwankai ha katei ka sngi, haba shimkhia pat ïa ka jingsngewkhia ka Dorbar Shnong ban khang ïa kiwei kiwei.
Ka ïing Bishar kala ailad ruh ïa ki dkhot ka Yatra ba kin theh um tang khyndiat lada ki kwah, hynrei kim dei ban pynlong ïa kano kano ka jingleh niam hapoh ka krem.
U Advocate General ula kular ïa ka ïing Bishar ba ka Jylla kan pynthikna ba kane ka Yatra kan ïaid beit ïaid ryntih. Ka ïing Bishar kala buh ban bishar biang ïa ka kam ba dang sah ha ka 1 tarik Nailur, 2026.