Ai jingkyrshan pura ka Raid Laban Dorbar Pyllun ïa ka Shillong Ropeway kwah ban pyndep kloi

Shillong, Nailar 8 : Ka Raid Laban Dorbar Pyllun ka la ai ka jingkyrshan ba pura na ka bynta ban pyntrei kloi ïa ka Shillong Ropeway bad kumta ka la kyntu ïa ka sorkar ban pynsted noh kloi ïa ka jingtrei.
Hadien ka jingleit jurip ïa katei ka Shillong Ropeway da ki heh ka tnad Tourism, Forest, PHE, Shillong Municipal Board, u President ka Dorbar Pyllun bah Iosterson Sun ki la rai ban pynïaid shakhmat ïa ka kam namar kane ka jaka ka hap hapoh u pud u sam ka Dorbar bad da ki spah ngut ki samla ki ban im ja na katei ka Shillong Ropeway.
“ Ngim ka Raid Laban Dorbar Pyllun ngi dei ki trai bad ngi peit ma ngi ruh ïa ka Shillong View Point. Na ka liang jong ngi ngim don kano kano ka jingpyrshah ïa ka Shillong Ropeway bad ngi ai ka jingkyrshan ba pura” ong u bah Sun.
U la ong ba lyngba ka jingdon kane ka Shillong Ropeway kan khring bun ki nongwan jngohkai sha katei ka jaka. “ Bun bah ki nongwan jngohkai kin wan da ka Ropeway bad kumta da ka jingmih kane ka projek ngi sngewkmen haduh katta katta namar ki nongwan jngohkai kin leit da ka Ropeway ban leit kai sha Shillong View Point” ong biang u bah Sun.
U la ong ruh ïa kane ka jingtyrwa ban tei ïa kane ka ropeway la dep ïakren bad iatai sani bha saw snem mynshwa bad kumta la kyrpad ïa ka sorkar ba kan sdang noh kloi ïa ka kam.