Baroh ki kali kamai kin hap ban pyndap kyrteng ban ïoh ïa ki jingthoh ban tah ha ki kali: SP Traffic

Shillong, Nailar 08: U Superintendent of Police (Traffic) ka East Khasi Hills, u Dr. Hari Prasanth M. R. ula pyntip ba baroh ki trai jong ki taksi kamai bad Auto Rickshaw kiba kamai ha East Khasi Hills District kin hap ban pyndap ïa ki phom ban ïoh ïa ki ‘Sticker’ kali.
Katkum ka jingpynbna, u SP Traffic, ula ong ba ka ophis kan sa ai ïa ki ‘Sticker’ ryngkat bad u nombar na ka bynta ki taksi kamai bad Auto Rickshaw, ha kaba kin hap ban siew ïa ka T.150 na ka bynta kawei ka ‘Sticker’.
Kane kan treikam naduh ka 7 tarik u Nailur haduh ka 6 tarik u Naiwieng 2026 bad hadien katei yn daiñ kuna T.500 kum ka jingslem ne Late Fee na ki trai kali, nongñiah jong ki taksi kamai bad Auto Rickshaw.
La bthah ïa ki trai kali bad nongñiah ba kin pynbiang ïa ki kot ki sla kiba lah dep pynthymmai (original) bad ki kot ki sla kiba la dep ban shon biang ne Photocopy ban ïohpdiang ïa ki ‘Sticker’ bad ïa ki kot ki sla na ka bynta katei yn sa buh noh kum ki rekod.
Ki kot ki sla kiba hap ban pynbiang ki kynthup ïa ka Registration Certificate, Permit, Insurance Certificate, Fitness Certificate, ka Trading License na ka bynta ki trai kali ki bym dei ki riewlum, ka Professional Tax, Passenger Tax, M.L.M.T.U Certificate, Pollution Certificate bad ïa ka EPIC/AADHAR ne kino kino ki ID ban pynshisha ïa kiba ïohpdiang (Trai Kali/Nongmihkhmat).
Hadien ba la khmih ïa baroh ki kot ki sla bad la shem ba ki long kiba la biang, yn sa aiti ïa ka ‘Sticker’ bad dei ban tah ïa ka ‘Sticker’ ha ka bynta ba shakhmat jong ka liang ka diang jong ka kali khnang ba kan long ka jingshngaiñ ïa ki nongleit nongwan.