Kumba 65 ngut ki Master Trainer ba shah hikai ban pynkhlaiñ sap hikai ha ki 7 tylli ki District ka Jylla Meghalaya

Shillong, Nailar 08: Ki Master Trainer kin ai jinghikai ïa 1,729 ngut ki nonghikai halor ki sap ba ïadei bad ka jingim, ka jingnang jingstad ha ka kam pisa tyngka, ka jingkoit jingkhiah ha ka bor pyrkhat, ka jingkoit jingkhiah ha ka liang ka jingshongkha bad ka jingkha khun!
Ka MTTA Academy, Malki, hapoh ka MPOWER Training of Master Trainers Programme kaba don mynta ha ka snem kaba 2 jong ka jingpyntreikam, la pynlong ïa ka jingai jinghikai kaba hynriew sngi naduh ka 3 tarik haduh ka 8 tarik Nailar 2026 ha Meghalaya Teacher Training Academy (MTTA), Malki, Shillong. Ka prokram ka la pynleit jingmut ha kaba pynkhlaiñ ïa ka bor treikam jong ki Master Trainer ha ki bynta ba kongsan jong ka jingnang jingstad ha ka jingim, ka jingnang jingstad ha ka liang ka pisa tyngka, ka jingkoit jingkhiah ha ka bor pyrkhat bad ka jingkoit jingkhiah ha ka liang ka jingshongkha bad ka jingkha khun, kaba la long u mawmer kaba kongsan ha kaba pyntreikam ïa ka prokram MPOWER bad ki jingpyrshang ba ïaibteng jong ka Meghalaya ban pynkhlaiñ ïa ka jingkyntiew ïa ka bor treikam jong ki nonghikai, ban kyntiew ïa ka jingheh jingsan pura jong ki samla, bad ban kyntiew ïa ki jingmih na ka jingïoh jinghikai ha kylleng ka jylla.
Ïa kane ka jingai jinghikai la kyrshan da ka MTTA, kaba la pynbiang ïa ka jingkyrshan ba donkam bad ki jaka ai jinghikai, katba ïa ki technical session la ai da ki nongïatreilang hapoh ka prokram MPOWER, ka Magic Bus India Foundation bad ka World Being India.
Ki Resource person na ka Magic Bus India Foundation bad ka World Being India ki la pynïaid ïa kane ka prokram kyntiew ïa ka bor treikam kaba hynriew sngi. Ha kane ka prokram ai jinghikai la wan ban ïashim bynta haduh 65 ngut ki Master Trainer na ki hynñiew tylli ki district kata ka East Khasi Hills, Ri Bhoi, East Jaiñtia Hills, South West Khasi Hills, West Garo Hills, East Garo Hills bad North Garo Hills. Ïa kane ka prokram la saiñdur khnang ban pynkhlaiñ ïa ka jingtip, ka jingtbit bad ki jinglah ban pynsuk ïa ki kam kiba donkam ban ïalam ïa ka bynta kaba bud jong ka jingai jinghikai ïa ki nonghikai hapoh ka prokram MPOWER.
Hadien ka jingpyndep kaba jop ïa kane ka prokram, ki Master Trainer kin ai jinghikai hok ïa 1,729 ngut ki nonghikai na ki skul SSA bad ki Skul Sorkar ha la ki jong ki jong ki distrik, kaba kyrshañ ïa ka jingpyntreikam hok ïa ka prokram MPOWER.
“Ka Master Trainer training jong ka MTTA ka long ka sienjam kaba kongsan ban pynkhlaiñ ïa ka bor treikam jong ki nonghikai ha kylleng ka jylla Meghalaya. Da kaba pynkhreh ïa ki Master Trainer jong ngi da ki jingtbit ban pynsuk ïa ki kam bad ka jingsngewthuh kaba kham jylliew shaphang ki jingtbit ha ka jingim, ka jingkoit jingkhiah ha ka bor pyrkhat, ka jingkoit jingkhiah ha ka liang ka jingshong kha bad ka jingkha khun, bad ka jinghikai shaphang ka kam pisa tyngka, ngi buh ïa ka nongrim na ka bynta ki kamra pule kiba kham kynthup lang ïa baroh bad kiba pynshong nongrim ha ki nongpule. Nga sngewnguh shibun ïa ka jingtreishitom jong ka kynhun MPOWER bad ki seng ba ïatreilang bad ngi ban pynlong ïa kane ka jingai jinghikai kaba jop,” la ong u Dr David M. Nongrum, Associate Professor, DERT & Additional Director, Meghalaya Teacher Training Academy (MTTA).
Ka jingai jinghikai ka pynkhreh ïa ki nong ïashim bynta da ka jingnang jingstad, ka jingtbit, bad ki rukom pynsuk ba lah ban pyndonkam kiba donkam ban pynbiang ïa ka jingai jinghikai ïa ki nonghikai ha ka rukom kaba seisoh, kaba bha ha ka jingnang jingstad ha ka jingim, ka jingnang jingstad ha ka kam ka pisa tyngka, ka koit ka khiah ha ka bor pyrkhat, bad ka koit ka khiah ha ka jingshongkha bad ka jingkha khun. Kine ki phang ba kongsan ki long ka bynta ba kongsan jong ka prokram bad ki nohsynniang sha ka jingroi ba pura jong ki samla da kaba kyntiew ïa ka jingïaineh, ka jingshim rai kaba don ka jingkitkhlieh, ka jingkoit jingkhiah ha ka jingsngew, ka jingïadei kaba koit ba khiah, ka jingsngewthuh shaphang ka kam pisa tyngka bad ki jaka pule kiba shngaiñ bad kiba kynthup lang ïa baroh. Shuh shuh, lyngba kine ki bynta, ki nongïashim bynta ki don ka jingsngewthuh kaba kham jylliew shaphang ka jingheh jingsan jong ki samla, ki rukom hikai kiba pynshong nongrim ha ki nongpule bad ki rukom hikai kiba kynthup lang ïa baroh, katba ki pynkhlaiñ ïa ki sap plie lad kiba donkam ban pynpoi ïa ki jingai jinghikai kiba ïadon bynta lang, kiba don jingmut bad kiba ktah ïa ki nonghikai ha kylleng ka jylla Meghalaya.
La sdang ïa ka prokram da ka jingpynshai shaphang ka prokram MPOWER, bud sa ka jingkren plie ba la ai da ka Kong J.U. Kharpuri, MCS, Director, DERT, kaba la ban jur ïa ka jingdonkam ban bei tyngka ha ka bor treikam jong ki nonghikai kum u mawjam jong ka jingkylla ha ka pule puthi. Ha baroh kawei ka prokram kaba hynriew sngi, ki nongïashim bynta ki la ïashim bynta ha ki jingïalang ïamir jingmut, ki jingpyni ïa ki kam ba lah ban leh, ki bynta kiba ïadei bad ki jingplie lad bad ki jingpynlong klas ba la saiñdur khnang ban pynkhlaiñ ïa ka jingsngewthuh jong ki ïa ki phang bad ka jingtbit ban plie lad.
Ka rukom hikai kaba pyndonkam da ka jingshem bad ka jingïashim bynta ka kyntiew ïa ka jingshaniah, ka jingtip bad ka jinglah ban treikam jong ki Master Trainer.
Ha ka sngi pynkut ïa ka prokram la don ka jingpeit bniah ïa ki jinghikai ba kongsan, ka jingbishar bniah hadien ka jingai jinghikai ban peit bniah ïa ka jingkiew jong ki nongïashim bynta, bad ka jingpynkhreh ïa ki plan ai jinghikai ïa ki nonghikai ha ki distrik ban ïalam ïa ka jingpyntrei kam kaba paka ïa ka bynta kaba bud jong ka prokram.
“Ka jingshit rhem bad ka jingaiti ba la pyni da ki Master Trainer ha baroh kawei ka prokram ka la long kaba ai mynsiem shisha. Ngi kyrmen ba ki jinghikai shaphang ki jingnang jingstad ha ka jingim, ka jingkoit jingkhiah ha ka bor pyrkhat, ka jingkoit jingkhiah ha ka liang ka jingshongkha bad ka jingkhakhun, bad ka jinghikai shaphang ka kam pisa tyngka kin ïarap ïa ki nonghikai ban wanrah ïa ka jinglong jingman jong ka jingpule kaba shngaiñ, kaba kyrshan, kaba kynthup lang ïa baroh bad kaba ïashim bynta ha kaba uwei pa uwei u khynnah u ïoh jinghikai bad sngewba u long uba ñiewkor,” la ong ka Dr. Caraline Y. Kharmalki, Assistant Professor, DERT & Nodal Officer, MPOWER.
Ka MTTA ka la pynskhem biang ïa ka jingkular jong ka ban tei ïa ki nonghikai kaba tbit bad kaba la pynkhreh na ka bynta ka lawei kaba lah ban ïahap bad ki jingdonkam kiba nangkylla jong ki nongpule da kaba pynkhlaiñ ïa ka bor treikam jong ki nonghikai bad ban kyntiew ïa ki rukom hikai kiba thymmai, kiba kynthup lang ïabaroh bad kiba pynshong nongrim ha ki khynnah. Ka MTTA ka ïaibteng ban don ka bynta kaba kongsan ha kaba kyntiew ïa ka jingthmu jong ka Meghalaya na ka bynta ka jingpule kaba bha kaba pynkhreh ïa uwei pa uwei u khynnah da ka jingnang jingstad, ka jingtbit bad ki nongrim kiba donkam ban long kiba jop ha ka pyrthei kaba kylla man ka por.