Hakhmat ka Dorbar Pyllun, pynshai u Nangtei Syiemiong ïa ki mat treikam jong ka Hima Langrin

Mawkyrwat, Nailar 07: Hadien ba ka Khasi Hills Autonomous District Council (KHADC) ka la thung biang (reinstate) ïa u Nangtei Syiemiong kum u Syiem ka Hima Langrin Syiemship, ka Hima Langrin mynta ka sngi ka 7 tarik ‘Nailar, 2026 ka la pynlong ïa ka Dorbar Pyllun ha kaba la pynshai paidbah halor ka jinglong jingman hadien ka jingthung biang ïa u Syiem bad ruh halor ki kam treikam jong ka Management Board jong ka Hima.
Ha kane ka dorbar, la ïoh jingkren bad jingpynshai na ki Myntri bad ki Lyngdoh jong ka Hima Langrin, kiba la batai ïa ki bynta bapher bapher kiba ïadei bad ka jingïaid beit ïaid ryntih jong ka Hima. U Pa’iem Nangtei Syiemiong ruh u la ai jingkren ha kaba u la kren halor ki kam bad ki jingthmu ban nang pynbha ïa ka synshar khadar hapoh jong ka Hima baroh kawei.
Ka dorbar ka la ïaid beit bad jai jai naduh kaba sdang haduh kaba kut. Hynrei, ha ka por ba la plie lad ban ïa kren, ka la mih ka jingkulmar hadien ba ki katto katne kiba pyrshah ki la pynpaw ba kim shym la ïoh lad ban ai jingkren lane ban pynpaw ïa la ki jong ki jingsngew.
Haba kren sha ki lad pathai khubor hadien ka dorbar, u Pa’iem Nangtei Syiemiong u la pynrem jur ïa ka jingmih jong katei ka jingkulmar bad ula kynnoh ba ki don ki briew kiba la ïalam bakla ïa ki liang pyrshah bad kiba kwah ban shim kabu na ka Dorbar Pyllun jong ka Hima, kaba la wanrah ïa ka jingbym ïa sngewthuh jingmut.
Namarkata, ula kyrpad ïa ki paidbah ka Hima Langrin ban ïai long kiba jai jai, ban ïatreilang bad ban kyrshan ïa ki jingïaid lynti jong ka Hima na ka bynta ka bha ka miat bad ka roi ka par jong ka imlang sahlang.