Ban lap ïa ka pateng tynrai bad ka jaka ba ki Jaidbynriew trai muluk ka Jylla ki wan

Shillong, Nailar 07: Ka Meghalaya kala sdang ïa ka project wadbniah kaba la angnud baroh shikatta, ban lap ïa ka pateng tynrai bad ka jaka ba ki Jaidbynriew trai muluk ka Jylla ki wan da kaba pyniasoh lang ïa ki khana pateng bad ka jingwad jingtip ïa kiei kiei kiba rim ba jah, ka ktien ka thylliej bad ka jingwad bniah ïa ka snam tynrai.
U Myntri Rangbah Conrad K Sangma ha ka sngi Thohdieng, ula shong bishar kam halor ka jingiaid ka project “Wad ïa ki Tynrai” (Tracing the Roots), ka project ba nyngkong eh jong ka Tnad Arts & Culture ban tei ïa ka sakhi kaba khlain bad kaba bniah halor ka pateng jong ki jaidbynriew trai muluk ka Meghalaya.
Ka project ka thmu ban pyndap ïa ki jingduna ha ki jingthoh shaphang ka histori ka Jylla da kaba buh jingthoh ïa ki jingia thuh ïa ki khana pateng, ki jingstad tynrai ki trai muluk, ki bor treikam nala tynrai, ki tamasa, ki kolshor bad ka jingim ka ktien ka thylliej, haba pynrung ïa ki ha ki kor digital na ka bynta ki pateng ban dang wan.
Ym kum ka jingwad bniah ba ju leh halor ka history, kane ka sienjam kan wanrah lang ïa ki historian, ki archaeologists, anthropologists, linguists bad kiwei ki riewshemphang ba kin wadbniah ïa ka thymmei bad ka jingkrih shnong jong ki jaidbynriew trai muluk ha ki por ba mynshuwa.
Kum shibynta jong kane ka sienjam, la buh ruh ïa ka rynsan digital ba kyrpang ban pynrung ïa ki jingthoh halor ki jingshem kiba la lap katba nang iaid ka jingwad bniah, ban pynneh pynsah ïa ki lad jingtip bad khot ïa shim bynta lang ki paidbah ha shilynter jong ka project.
Ki Ophisar kila pyntip ba ki jingpynkhreh mynta kila nang ïaid naduh u bnai Rymphang, kynthup ka jingthung ïa ka Kynhun leh Research bad ka jingpynwan dur ïa ka rukom pyntrei ïa ka project.Kane ka sienjam kan kynthup ïa ka jingiatrei lang bad ki jaka pule ba pawnam ka Ri bad Bar Ri ba kin ianujor shaphang ki histori, ka ktien thylliej bad ka kolshor.
Haba bishar ïa ka jingiaid ka project, u Conrad ula ong ba kane ka sienjam ka thmu ban wanrah ïa ka jingsngewthuh kaba khlain ïa ka mynnor jong ki jaidbynriew trai muluk ka Jylla haba ïada ruh ïa ki khana pateng ba shu ïathuh da ka ktien bad ka kolshor kaba la ai pateng na kawei ka pateng sha kawei pat.