Wanrah hapoh ka ïingdorbar ïa ki 10 tylli ki mat ban ïathir ïatai da baroh 60 ngut ki MLA

Shillong, Nailar 5 : U Myntri Rangbah ka jylla u Conrad K Sangma mynta ka Sngi Balang u la ong ba ka sorkar kam pat khang ïa ka jingkhang na ka bynta ka jingïakren bad ïamir jingmut bad u kyntu ïa ka Voice of the People Party (VPP) ban wanrah ïa ki 10 tylli ki mat hapoh ka Assembly khnang ban ïashim bynta ban ïathir ïatai da baroh 60 ngut ki MLA.
ïa kane ka jubab u la ai hadien ba ka VPP ka la rai ban ïaid paidbah sha Secretarat ha ka Sngi Palei 6 tarik Nailar halor ki jingkynnoh ba ka sorkar ka khlem leh ei ei halor ki 10 tylli ki mat ba la buh da ka VPP.
Haba ïakren bad ki lad pathai khubor u Myntri Rangbah u la ong ba ka sorkar ka kloi ban ïakren bad no bad no halor kino kino ki mat ne ishu.
“Ngi long beit kiba kloi ïa kano kano ka jingïakren. Ngi la ju kren na ka por sha ka por ïa kane ba lada don kano kano ka jingeh, ngi long kiba kloi ban ïakren kam pher ka dei ïa kano kano ka kam ruh” ula ong.
U Myntri Rangbah ula bynrap ba ka riti synshar paidbah ka bthah ba ïa kum kine ki kam dei ban rah ïakren ha ïing Dorbar Thaw Aiñ, ka ban sa shong dorbar shen.
“Kumta, lada phi don ïa kano kano ka jingsngewkhia, ka ïing Dorbar Thaw Aiñ ka dei ka rynsan kaba biang. Hynrei lait na kata, kum ka Sorkar ngim ju khang ïano ïano ruh ban wan ïakren. Kumta, lada ki kwah ban don kano kano ka jingïakren, ngi long kiba kloi bad kane ka dei ka nongrim jong ngi” ula ong.