NONGSTOIN, Nailar 06: U wei na ki Rangbah Kur Marthong, u Dr.Boss L.Marthong, u la khot sngewbha ïa u Heprit Donald Marthong ban ai khublei kit bok kit rwiang ha ka jingdon bynta jong une u heprit ha ka jingjop jong ka Minerva Football Academy ïa ka World Youth Cup.
Ha kane ka jingïalang, u Dr.Boss L.Marthong u la ïoh ban sneng ban khraw ïa u ne u heprit Donald ba um dei ban ngop ha ki jingdih kiba pyn sniew ïaka met.
U la ban jur ba udei ban im tip briew tip blei bad ban shanñiah ha u Blei ba un nang ai bor shuh shuh ïa u nangne sha khmat ba un nang lah ban pynpaw khmat ïaka kur bad ka jait bynriew Khasi bad ïa ka ri India hi baroh kawei, da kaba kyrmen ba ki heprit jong ka thaiñ shatei lam mihngi ki lah ban kyntiew ïa ka phutbol India.
“Ngi don jing kyrmen bakhraw ïa ka Ri India ha ka Football ba kan paw haka pyrthei lyngba ki Hepit jong ka North East India lyngba ka Minerva Football Academy kaba don ha jylla Punjab,”.
Lah ban kdew hangne, ki don shibun bah ki Heprit na ka thaiñ kiba don haka training bad katei ka shlem ai jinghikai phutbol ba pawnam jong ka Ri India kaba pynbit pynbiang ruh ïaka jinghikai Skul nalor ka phutbol.
U heprit Donald Marthong, 12 Snem ka rta, u dei u khun jong u Babu Franko Puwein bad ka Kong Daplin Marthong na ka Shnong Risiang, West Khasi Hills, kaba hap hapoh ka Hima Nongstoin.
U la long uwei na ki ar ngut ki heprit ka jylla, ryngkat bad u Mekhamkhraw Nongrem, u ba na Mairang, kiba la mihkhmat ïaka Ri India sha World Youth Cup lyngba ka Minerva Football Academy.
Ha katei ka lympung ka Minerva FA, ka la aireng pyrshah ïa ki klob phutbol bar ri hynrei kam shym la khanglad ïa ki ban rah ïa ka nam lahduh ha Helsinki Cup ha Finland, bad dang shen ïa ka Gothia Cup ha Sweden da kaba pynliem ïa ka klob RS yellow na Brazil ha ka phainal kaba la long ha ka 19 tarik Naitung, 2026.
Ha katei ka jingïakhun u heprit Donald Marthong u la ïoh ban thep ïa ka kol kaba kongsan tam, ha kaba ka kynhun ka la jop da 2-1 kol. Baroh arngut ki heprit na Meghalaya ki la ïohlad ban mih madan ha katei ka jingïakhun.
