Nongstoiñ, Nailar 05 : U laha udei u mar rep uba kongsan bha ha ki shnong kiba don ha khappud bad ka Assam bad u dei ruh u mar rep uba kham phylla bad uba rem dor bha hynrei haduh mynta na ka liang ki tnad trei kam jong ka sorkar kiba peit ïa ka rep ka riang kim pat tip ne ithuh satia ba utei u jait mar rep u long kumno, haei u mih , kumno ki rep , ha ka dor katno la pynïaid ïew bad katn sien ha ka shisnem lah ban ïoh. Ha kaba ïadei bad ka jingrep ïa u laha u nongthohkhubor jong u Mawphor ha kane ka sngi balang ka 5 tarik Nailar u la ïoh ban ïakren bad u bah Phikshon Wanñiang uwei na ki nongrep laha uba shong bas ah ha ka shnong Nongmawleiñ kaba jngai kumba 4 kilomitar shaphang shatei lam sepngi na ka shnogn Langpih West Khasi hills uba dei uwei na iki nongrep laha uaba tbit.
Ha kaba ïadei bad ka kam rep laha u bah Wanñiang u la ïathuh ba u laha u dei u jait mar rep uba la pynlong da ki kynja khñiang kiba rit kiba im ha ki kynja dieng kiba dei na ka jait dieng jri. Nalor kata u la iathuh ba utei u jait ki khñiang ki im ha ki dieng bad haba bam ïa ka snep jong ki tnad dieng kiba rit ki pynmih ïa ka eit kaba sboh bha kaba sop baroh sawdong ïa ki tnad dieng bad ha katei ka sboh ki kha ïa ki pylleng .U la ïathuh ruh ba ynda ka sboh ba kiktei ki khñiang ki pynmih ka la ryngkhiang ki kylla rong sawbyrïong bad la ju kheit ïa u laha arsien ha ka shisnem kata ha u bnai Jymmang bad Naiwieng .
U bah Wanñiang u la ïathuh ruh ba lada iehnoh ïa u laha ha ki tnad dieng ynda la poi u bnai Lber ki pylleng kiba don shapoh ki la kylla thabalieh bad haba ki mih ki her na uwei u dieng sha uwei u dieng da ka kynhun kum u ngap bad katba ki nag bam ïa ka snep dieng ki nang pynmih ïa ka sboh eit bad kha pylleng artad. Nalor kata u la ïathuh ruh ba u ju pynïaid ïew ïa u laha sha Hahim bad lada ka dei ka por ba ka dor ïew dor hat ka hiar u poi tang sawspah tyngka shi kilo hynrei lada dei ka por ba ka ïew ka hat ka biang u ju die san haduh hynriew spah tyngka shi kilo. Haba kylli pat ba haduh katno kilo u ju ïoh man la u snem u la ïathuh ba lada dei ka por ba ki khñiang ki bha ha ka shisien kheit u ju ïoh haduh arspah kilo tam .
Ha kajuh ka por u la ong bal ka kam rep laha kam dei tang ka kam ban kyntiew ïa ka mai kajih bad ka ïoh ka kot hynrei ka dei ruh ka kam kaba kongsan ha kaba pynneh pynsah ïa ka mariang nara haba rep laha don kam ban thung da ki dieng bad ki dieng laha ki dei ruh ki dieng kiba heh bha kiba pyntngen ïa ka khyndew. Ym tang katta hynrei ki sim kid oh ruh ki bam bha ïa ki soh jong kitei ki jait dieng tangba ha iki jaka khriat wat lada utei u jait dieng u lah ban im lada thung ruh hynrei u khñiang ba pynmih laha te um tip la u im ne um im ruh.
