Shillong, Nailar 4: Ka Sorkar Meghalaya ka la pynbna ba ïa ka bai bylla jong baroh ki nongtrei hapoh ka skhim VB-GRAM bad ka VB-REGLMS na ka bynta u bnai Naitung 2026, yn sa pullait hapoh kine ki ar sngi ban wan, ka ban wanrah ïa ka jingmyntoi ïa ki nongtrei kiba shah ktah na ka jingpynkylla ïa ka MGNREGA sha ka VB-GRAM,VB REGLMS.
Katkum ka jingpynbna ba la pynmih da ka State Rural Employment Society, ïa ka mang tyngka na ka bynta ka jingpynïaid kam lah dep ban ïoh pdiang na ka Ministry of Rural Development, kaba pynlah ïa ka sorkar ban pyllait noh mardor ïa ka tulop jong une u bnai. Ka jingpynbeit kan bteng naduh u bnai Naitung 2026 ter ter.
U Director ka Mission, SRES, u Sibhi Chakravarthy Sadhu u la ong ba ka Jylla ka la mad ïa ki katto katne ki jingeh ha kaba pynkhuid ïa ka bai bylla ka TA/DA bad kiwei kiwei ki jingsiew jong ka Sorkar hadien ba la weng noh ïa ka MGNREGA bad la pyntreikam ïa ka VB-GRAM/VB-REGLMS ha Meghalaya.
Haba kren shaphang ki jingsiew kiba dang sahteng, u Sadhu u la pynpaw ba ka tnat ka dang ïakynduh bad ka MoRD na ka bynta ban “pyllait kloi ïa baroh ki jingsiew, ka TA/DA bad kiwei kiwei ki bynta jong ka administrative components kiba dei ban siew haduh ka 30 tarik u Jylliew 2026” na ka bynta ki nongtrei kiba dang ïoh ïa ka jingsiew na ka bynta u bnai Iaiong-Jylliew ne Jymmang-Jylliew 2026.
U la bynrap ba lada ka Sorkar Pdeng ka dang pynslem ïa ka mang tyngka yn ai katto katne ka jingpynlait pisa lyngba ki jingdon jingem jong ka Jylla,” kumjuh kumba la leh ha u snem 2025 ha kaba “ïa ka bai bylla jong ki nongtrei na ka bynta 1-2 bnai ruh la pynlong kum ki jingpynbeit shipor lyngba ka Sorkar Jylla.
Ka kyrwoh ka la pynshai ba “Baroh ki jingsiew la pynkhuid haduh u bnai Lber 2026 bad ha ki katto katne ki District haduh u bnai Iaiong 2026 bad na ka bynta ki bnai kiba dang sah, la pyrshang ban pynthikna ba ki jingsiew kin dep noh.
Ka jingpynshai ka wan ha ka por ba ka VB-GRAM bad ka VB-REGLMS ki bujli ïa ka MGNREGA ha ka Jylla, ha kaba ka Sorkar ka wad ban pynbeit ïa ka jingsiew bad ki rukom synshar na ka bynta ki nongtrei ha ki thaiñ nongkyndong.
