Nongstoiñ, Naitung 04: Ka West Khasi Hills ka dei ka District kaba heh duh na baroh ki district ha ka jylla, ka dei ruh ka district kaba la kynjoh 50 snem u bnai Risaw mynta u snem, tangba ki kam pynroi ki dang duna haduh katta katta la ka long ha ki surok, ka umbam umdih bad ka bording.
Napdeng ki lai tylli ki Constituency, ki shnong ka Rambrai Jyrngam bad ka Mawshynrut ki dei ki Constituency kiba dang bun ki shnong ki bym pat don surok, kum ki shnong kiba don ha ka thaiñ Mawkhiat kata naduh Mawshad, Umshem, Rynñiaw, Domkyrkoh, Umïong, Darephang, Nongspung, Umbah, Nongmawleiñ, Mawkhap, Mawsngi, Umyiap, Miangbyrkong, Mawdiangsnam bad kiwei kiwei. Hynrei kine ki shnong, ki la ïoh pat ïa ka bording elektrik na ka skhim RGVVY, kaba dei ka skhim jong ka sorkar pdeng.
Ki shnong kiba hap ha ka Mawshynrut Constiuency ki bym pat don surok ki dei naduh Nongshyrkon, Nonglyer, Phodjalei, Nongkrong, Umshynrut Mawkhar, Nongsleh bad kiwei kiwei. Ha kaba ïadei bad ka jingbym pat don surok, ki paitbah ka Nongshyrkon, Umshynrut, Nongkrong bad kiwei kiwei, ki la ong ba la slem bah ki la kwah ban ïoh surok, hynrei haduh mynta ki dang hap ban ïaid kjat da ki bun bun kynta ban poi ha surok kali.
Nalor kata ki la ong ruh ba lada dei ha ka por tlang te kam da jynjar than, namar ki Mahindra pickup ki lait wut wut. Hynrei ha ka por lyiur te wat ki kynthei ruh ki hap ban hiar bad khynñiat lang kham ïa ka kali, hynrei bun kaba sah kut ban ïa kaba ïaid beit.
Namarkata, na ka liang ki paidbah nongshong shnong khamtam na kine ki ar tylli ki Constituency ki da kyntu eh ïa ka sorkar MDA ba la ïa lam da ka NPP, kumjuh ruh ïa ki nongmihkhmat jong kine ki Constituency ba kin shimkhia ban peit ïa ka khia ka shon jong ki paidbah nongkyndong.
