Mairang, Nailar Nailar 04: Ka imlang sahlang jong ha ki shnong ki thaw ha ki por mynshuwa kaba la ïathuh khana da ki riew tymmen ka long shisha kaba ki nongshong shnong ha kine ki sngi kim lah shuh ban ngeit ba ka long kaba shisha hynrei ki la shu mutdur ba ka dei tang ka jingïathuh khana pursikam.
Ha kine ki khyndiat sngi ba la dep la ïoh ban ïashong kai bad u parad Roiland Hoojon na ka shnong Mawlaisyiem Eastern West Khasi hills bad ha ka jingïapurkhana bad u shaphang ka jinglong jingman jong ka imlang sahlang, ka longbriew man briew ha kine ki sngi utei u parad u la pynpaw ïa ka jingsngewkhia ha kaba u la ïathuh ba ha ka jinglap jong u ka imlang sahlang ha kine ki sngi ka la kylla da khongpong haba ïanujor bad ki por ba mynshuwa.
Nalor kata u la ong ruh ba wat ha ka synshar khaddar kata naduh ki it ki hima, ki shnong ki thaw, ha ka kur ka jait bad wat ha ki longïng longsem ki la bun satang ki kynrum kynram, ka bishni ka pihuiñ, ka sin ka rngop uwei ïa uwei pat, ka hangamei ka la kiew skong, haba sneng haba kraw bad pyni ïa ka jingshisha satang katto katne kiba sngap bad kohnguh hynrei kiba bun balang kim patiaw eiei namar la shongkulai ka hanga mei. Shuh u la ïathuh ba ha ki por ba mynshuwa haba ki para shnong para thaw ki marjan marpa ki ïakynduh ïa kino kino ki jingeh ki marjan marpa, ki para shnong para thaw ki ju ïarap bad kim ju tyngkai ïa ka por bad ka bor na ka bynta ban ïarap ïa kiba ïakynduh jingeh.
Kawei ka khana kaba kham sngewtynnad kaba u la ïathuh ka dei shaphang ka jinglong jingman jong ka imlang shalang ha ka thaiñ Parïong bad Mawlaisyiem. Ha kaba ïadei bad ka jinglong jingman ha katei ka thaiñ u la ong ba mynshuwa eh ha ka por ba ki mih na Parïong ban leit sha Mawlaisyiem kim shym la mih ban leit buhai shnong hynrei ban leit rep leit riang hynrei namar ka jing jngai jong ka shnong ki la thaw shnong noh ha katei ka jaka.
Nalor kata u la ïathuh ba naduh ka shnong Wahliewlong kaba don shpang mihngi haduh ka shnong Mawlaisyiem haduh ka shnong Mawroh kaba shaphang shathie lam mihngi jong ka shnong Markasa ki dang hap ha ka jaka ba ki khot ka Dom Marweiñ. Shuh shuh u la ïathuh ba mynshuwa eh ïa ka kur Marweiñ na ka thaiñ Parïong ka la longtrai ïa katei ka jaka hynrei kim shym don kino kino ki jingthoh jingtar ki ban pynshisha ba ka kur Marweiñ ka long trai.
U la ong ruh ba ha kata ka por na ka liang ki rangbah kur Marweiñ kim pat don kiba nang ban thoh dulir khyndew kumta ki rangbah kur ki la ïa pynbeit ban khot ïa ki rangbah kur Thabah namar ki dei kiba la kham nang kham stad ha ka thoh ka tar ba kin ïarap lem ha ka ban pynthoh ïa ka dulir khyndew na ka bynta ban pynskhem ba ka dei ka rikynti jong ka kur Marweiñ. La ong ruh ba ki rangbah kur Thabah ruh da ka jingsngew ieit bad burom ïa ki para shnong para thaw ki la kohnguh bad ki la ïarap ban pynthoh ïa ka dulir jong katei ka khyndew. Kumta kum ka dak jong ka jingsngew burom kylliang ïa ki kur Thabah ka kur Marweiñ ka la ai sngewbha shi bynta na katei ka khyndew kaba don shaphang shatei na ka shnong Mawkohngei bad ka jingheh jong katei ka jaka ka don ym duna ïa ka sanphew akar bad haduh mynta katei ka jaka ka dei ka rikynti jong ka kur Thabah na ka Hima Mawïang.
