Jowai, Nailar 04: Ki pulit ka West Jaiñtia Hills ki la ïoh ban kem ïa ki lai ngut ki briew kiba donkti halor ka jingshah pynïap ba shyrkhei jong u (L) Damehi Mulieh (28 snem ka rta) na ka shnong Ïalong WJHD, katba ïa ka met ïap jong u la ïoh tam na Khliehriat EJHD ha ka 31 tarik u Naitung, 2026.
Ha ka 31 tarik Naitung, ki pulit ka Jowai kila ïoh jingtip ka don kawei ka kali Maruti Alto K10 Registration No. ML05 AG-0285 kaba khlem don ki kot ki sla ban pynshisha, ka la shah bat ha ki pulit ka Gumrah, Cachar District, Assam ryngkat bad arngut ki briew kiba don ha katei ka kali.
Na ka liang ka kynhun pulit na Phramer Traffic Cell, WJHD mar mar ki la leit sha Gumrah, Assam, da ka jingïatreilang bad ki pulit ka Gumrah ki la kurup noh ïa katei ka kali katkum ki kyndon aiñ bad ki la wanrah ïa kitei ki briew sha Meghalaya ban tohkit bniah ïa ki.
Ha kajuh ka por ki bahaïing ki la lap ïa ka met ïap u Damehi Mulieh na Khliehriat bad la pyntikna ba katei ka kali ka dei jong u nongshah pynïap. Ïa ka mukotduma halor ka jingshah tuh kali bad ka kam pynïap la register ha Jowai PS Case No. 56 (07) 2026 katkum ki kyndon 103 (1) bad 140 (1) jong ka Bharatiya Nyaya Sanhita (BNS).
Ha ka jingtohkit, ïa kitei ki ar ngut ki briew kiba la ïoh kem ha ka 31.07.2026, ba kynthup ïa u Dapjingkmen Paslein (26), na Lakaseiñ EJHD bad u Samuel Iakai (25) na Umkyrpong East Jaiñtia Hills District. Ha ka 04.08.2026, ki pulit ki la kem sa uwei briew u Duniwankmen Sutnga (26 snem) na ka shnong Khaidong, EJHD. Baroh lai ngut la leit rah bishar ïa ki hakhmat ka ïingkashari ba donburom khnang ban tohkit bniah halor kane ka jingjia.
Ki pulit ki la kyntu ïa ki nongshong shnong ba kin long kiba husiar bha ïa ki kali jong ki manla ka por. Lada don kino kino ki kam runar ki lah ban pyntip mardor da kaba phone ha u toll-free Police Emergency Helpline 112.
