Shillong, Nailar 3: Ka jingsyier ka la mih kynsan ha ka ophis jong ka Meghalaya State Pollution Control Board ha ka por shiteng sngi jong ka sngi Nyngkong hadien ba arngut ki briew kiba deng mask kiba shong ha ki scooty ki la kynnoh ba ki la kawang petrol bom hapoh katei ka jaka.
Ki heh ophisar jong ka MSPCB ki la ïathuh ba kane ka jingjia ka la jia hapdeng ka por 12 baje mynstep haduh 12:30 shiteng sngi.
Ki runar ki la thew beit beit ïa ar tylli ki jaka hapoh ka phyllaw jong ka ophis shwa ban phet krad na katei ka jaka.
Donbok ba ym shym la don kano kano ka jingjulor.
“Ngi la ujor da ka ejahar ha Laitumkhrah police station, ki pulit bad ka forensic team ki la leit jurip ïa katei ka jaka”, la ong uwei u heh ophisar.
U Superitendent of Police (SP) City u Bah Dangsan Khyriem u la pynthikna ïa kane ka jingshah thombor.
“Ki la don ar tylli ki petrol bomb ba la kawang.Ka Board kan sa ujor da ka ejahar bad ynda la dep ïa kata ngin sa register ïa ka case, ka jingtohkit ban kem ïa ki nongleh kam sniew ka la sdang”, u la ong.
Ka kynhun jong ka forensic ka la lum ïa ki nongmuna bad pynthikna ba kitei ki tiar ki dei ki bom petrol.
Haba kylli la kane ka jingjia ka don jingïadei bad ki jingïakhih ba dang shen pyrshah ïa ka karkhana Shree Cement, u bah Khyriem u la ong ba ka dang kloi than ban ong eiei.
“Ngam tip.Kata ka dei ka bynta jong ka jingtohkit”, u la bynrap.
Ki pulit ki dang peit bniah ïa ki dur CCTV na katei ka jaka bad ki la pynlong ïa ka jingthwet ïa kitei ki arngut kiba suba donkti.
