Nangjur ka jingïakhih halor ka Kulsi Hydropower Project ba 1454.95 klur ha khappud Assam-Meghalaya

Boko, Nailur 02: Ka jingpyrshah ïa ka jingthmu ban tei ïa ka Kulsi Hydropower Project kaba ?1,454.95 klur ka la nang jur ha ka sngi Thohdieng, ha kaba ki kynhun pyrshah dam ki la maham ïa ka jingïakhih kaba tyngeh hadien ba ki bor ba dei peit ki la ïaid shakhmat bad ki jingthmu na ka bynta kane ka projek kaba don jingïakynad ha khappud Assam-Meghalaya.
Haba kren bad ki lad pathai khubor, ka Kulsi Nadibandh Birodhi Sangrami Mancha (Anti-Kulsi Dam Struggle Forum), kaba la kyrshan da ki katto katne ki sengbhalang, ka la kynnoh ba ka sorkar ka la pyniaid sha khmat ia ka 55 MW hydropower project wat hapdeng ka jingpyrshah ki paidbah na ki jaidbynriew kiba sah harud ka wah Kulsi.
Kitei ki jingïakhih ba thymmai ki wan hadien katto katne sngi ba ka Brahmaputra Board ka la aiti pura ïa ka Detailed Project Report (DPR) bad ki kot ki sla kiba ïadei bad kane sha ka Assam Power Generation Corporation Limited (APGCL), kaba ai dak ba ka projek ka la rung sha ka kyrdan pyntreikam.Ia kine ki kot ki sla la ai kylliang hapdeng u General Manager ka Brahmaputra Board u Abhay Kumar bad u Chief General Manager ka APGCL u Saurav Saikia.
Katei ka dam, kaba la thmu ban shna ha Ukiam ha khappud Assam-Meghalaya, la antad, ba kan shongdor ?1,454.95 klur.Katkum ki jingtip ba bniah jong ka projek, ka kynthup ïa ka jingshnaïia ka dam kaba jrong 60 phut kaba ki nongiakhih ki kam ba kan ktah ia jan 26,000 hectare ka jaka bad kan ktah ia ki jaka shong jaka sah naduh Ukiam lyngba Chhaygaon haduh Chamaria.
Ki nongshong shnong bad ki kynhun kiba ïada ïa ka mariang ki tieng ba kane ka projek kan wanrah ïa ka jingshah pynkynriah jaka kaba heh, ban pynngam ïa ki jaka rep bad ki khlaw, bad ban pynkylla ïa ka mariang jong ka wah Kulsi, kaba kyrshan ïa ka jingim jong ki hajar ngut ki briew ha baroh arliang jong u pud u sam hapdeng ki jylla.
Ki nongïakhih ki la kynthoh ruh ïa ka Rabha Hasong Autonomous Council bad ki nongthaw aiñ jong ka thaiñ kiba la sngap jar halor kane ka mat, da kaba kynnoh ba ki nongmihkhmat ba la jied kim shym la lah ban pynpaw ïa ka jingsngew jong ki paidbah.
La ïathuh ba ka Brahmaputra Board, kaba trei hapoh ka Union Ministry of Jal Shakti, ka la kyntu ban sdang kloi ïa ki jingtrei na ka bynta katei ka projek.
Haba maham ba ka jingbitar paidbah ka nang kiew ha baroh ar tylli ki Assam bad ha Meghalaya, ka kynhun pyrshah dam ka la ong ba kan nang pynjur shuh shuh ïa ka jingïakhih lymda ka sorkar kan weng noh ïa kane ka projek.