Ka jingeh na u drok ym dei ba mad tang ka Meghalaya hynrei ha ka pyrthei salonsar: Paul Lyngdoh

Shillong, Nailar 02: U nongaibuit ka Tnat Social Welfare u Bah Paul Lyngdoh u la ong ba ka jingeh jong ka kam khaïi bad dih drok kam dei tang ha ka jylla Meghalaya, kam dei ruh tang ka jingeh jong ka thaiñ hynrei ka dei ka jingeh ha ka pyrthei baroh kawei, hynrei ka Meghalaya ka hap mad ïa kane ka jingeh na ka daw jong ki laidong, kaba mut ba ka Meghalaya kadei ka lynti ïaid ki briew na Assam bad Manipur bad kiwei ki jylla.
Haba phai sha ki pyrshang ka tnat Social Welfare u la ong ba tang hapdeng ki 7 Sngi la lah ban don 3 tylli ki prokram ba heh hapoh ka DREAM mission kaban ïarap ïa ki samla bad khamtam ïa kito kiba la kyrni ha ki jingdih drok ba kin kylla bad eh noh ïa une u jingdih pynbuaid uba la ktah ïa ki ïing ki sem bad kumjuh ruh ïa ka imlang sahlang baroh kawei.
Ïa kane u Bah Paul u la ong hadien ba la kut ka prokram Social Welfare ban ai jingpynsngewthuh halor ki jingma na u drok kaba la long ka State Guest House Taraghar dangshen.
Hadien ba la pynlait ïa ka kali ai jingsumar ïa kiba kyrni dih drok jong ka thaiñ Tura u Bah Lyngdoh u la ong ba ka Sorkar ka pynkhlaiñ ïa ka jingleit khynra da ki pulit sha ki jaka bym ju ïoh leit ha ki por mynshwa bad ki la don ruh ki briew ba la shah bat bad ngat hapoh ka kyndon PIDS NDPS Act bad ban pynkhlaiñ tehlakam ïa ka kam khaïi bad dih drok la pyndonkam ruh da ki Dog Squad K9 kiba la shah pyntbit bha halor kane ka kam. U la ong ruh ba kumba ka long haduh mynta ka tnat Social Welfare bad ka kynhun pulit Anti Narcotics Task Force ki la ïatrei shitom bha ban leh bun ki jaitkam bad wanrah ïa ki rukom pyrkhat bapher bapher kumno ban lah rat diengkhong ïa une u jingdih pynbuaid uba la ktah bha ïa ki samla bad kumjuh ruh ïa ka imlang bad ka jylla baroh kawei.
“Baroh ki jylla ha kane ka ri India bad kumjuh ruh ha ka pyrthei baroh kawei ki ïakhun ïa kane ka thma jong ka jingshah pynjot ha une u jingdih pynbuaid uba la ktah ïa ka pyrthei baroh kawei, kumta donkam ka jingïatreilang ha baroh ki liang ban lah pynduh jait ïa une u jingdih ba sniew uba ktah bha haduh kine ki sngi,” ong u Bah Paul.
Ha kawei pat ka liang u MLA ka West Shillong bad u nongïalam ka UDP u Bah Paul, halor ka Foreign Contribution (Regulation) Ammendment Bill, 2026, u la ong haba don jingartatien dei ban phah shwa sha ka Joint Parliamentary Committee (JPC) khnang ba baroh kin shai.