Nongstoiñ, Nailar 02: Na ka bynta pynsngewthuh sha ki para samla ba kin kiar na ki jingmlien ba sniew ki samla pule ka Nongstoiñ Collge ha ryngkat ka jingïatreilang bad MY Bharat Kendra Nongstoiñ ki la pynlong ïa ka prokram kaba ar sngi kaba la tip kum ka Nasha Mukt Yuva for Viksit Bharat kaba la sdang naduh ka sngi palei ka 30 tarik Naitung.
Ha kane ka sngi Thohdieng ka 31 tarik Naitung, ïa katei ka prokram la pynkut noh da kaba pynlong Ïa ka jingïakob ai rong kaba la leh da ki samla pule jong ka Nongstoiñ College, ka jingthoh Ïa ki slogan da ka Jawahar Navodaya Vidyalaya, ka jingthoh poetry bad ka Rap Battle da ka Nongstoiñ College, jingÏakop rwai da ka Sib Singh Government Higher Secondary School ïakop shad da ka Nongstoiñ College.
Ïa katei ka prokram la pynkut ha kane ka sngi Thohdieng ka 31 tarik Naitung ha katei ka College. Ha katei ka sngi pynkut ïa ka prokram la ïadonlang da ka C.N.N Sangma Asistant Commissioner kum ka kongsan bad u K Jethwari Deputy Director MY Bharat Kendra Nongstoiñ kum u symbud kongsan ka kong I. Mawthoh Princpal jong ka Nongstoiñ College bad ki samla pule na ki skul bapher bapher kiba don ha ka thaiñ Nongstoiñ.
Ka Sangma haba ai jingkren kum ka kongsan ha katei ka sngi ka la pynsngewthuh ba ki samla ki dei ki rishot na ka bynta ka lawei kaba skhem jong ka ri bad ka jaitbynriew, ka shnong ka thaw bad ka imlang sahlang kaba bha. Ka la ong ruh ba ha kine ki sngi ka thma ba shyrkhei jong ki samla ka dei ban kiar na u drok namar lada ki ngop ha utei u jingdih ba sniew ka ktah ïa ka ïng ka sem, ka imlang sahlang bad khamtam ïa ka jingkoit jingkhiah bad ka lawei jong ki samla.
Ka Sangma ka la kyntu jur ruh ïa ki samla ba kin pynleit jingmut kumno ban tei ïa ka imlang shalang kaba bha bad ba kin ïalam ïa kiwei ba kin im ha ka jingim kaba beit da kaba shim ruh ïa ka jingkitkhlieh ban tei ïa ka lawei kaba bha ïa ka ri baroh kawei. Khatduh eh la sam ïa ki khusnam bad ki syrnot sha ki nongïashim bynta kiba la jop ha ka jingïakop katkum ki bynta ba la bynshet ha ki.
