Shillong, Nailar 02: Ka kynhun ïalehkai jong ka Sanmer SC ka la lah ba kan pynliem noh da 2-0 ïa ka Lamlynti FC ha ka jingïakhun phainal ban rah ïa ka nam lahduh ha ka Shillong Sports Association Third Division Football league 2026.
Ka jingïakhun phainal ka la long hynne ka sngi Saitjaiñ (01 tarik Nailar 2026) ha madan First Ground SSA Stadium, ïa kaba la sakhi lang da ki nongïalam ba rangbah jong ka SSA naduh u President Bah Banteidor Lyngdoh lem bad kiwei kiwei, nangta ki paidbah nongkyrshan, kaba bun naki ki la wan ban kyrshan ïa ka Sanmer.
Shuwa kane ka jingïakhun baroh ar liang, ka Sanmer bad ka Lamlynti (lem bad ki ar tylli ki kynhun ba shah rem noh ha ka semi final, kata ka Pomlakrai SC bad ka Umiew Maw U sam) ki ladep ban pynthikna ïalade ban kiew kyrdan sha ka Second Division ha ka samoi ban wan.
Ha ka phainal, ka kylla step ka la kut khlem kol shuwa ba ka Sanmer kan thep ar tylli ki kol lyngba u Khrawkupar Nongbri (minit 70) bad u Emerald Jyrwa (77 minit) ban pynskhem ïa ka nam lahduh ha kane ka kyrdan shuwa ba kan ïakhun pat ha ka Second Division ha ka samoi ban wan.
Kum ka lahduh ka Sanmer ka la ïohpdiang ïa ka khusnam pisa kaba 80 hajar ryngkat ka trophy ba la aiti da u President ka SSA bah Banteidor Lyngdoh, katba ka Lamlynti ka la khur ïa ka song khusnam kaba 40 hajar kum ka kynhun ba wan ba-ar (Runners Up).
La sam ruh ïa ki khusnam shimet sha ki rangïalehkai ba kynsai, ha kaba u Khrawkupar u la khur ïa ka nam Player of the Final, katba ka nam Top Scorer la khur lang da ar ngut ki rangïalehkai kiba la thep mar katjuh ka kol (4 kol), kata u Adelbor K Shun jong ka Lummawbah kaba la shah rem noh ha ka Super 8 stage, bad u Vicky Kurkalang jong ka Pomlakrai.
Kumba la kdew, ki saw tylli ki kynhun ba poi shaduh ka semi final (Pomlakrai, Umiew Maw U Sam, Sanmer bad ka Lamlynti) ki la kiew kyrdan sha ka Second Division na ka bynta ka samoi ban wan, katba ka Nongumlong SC bad ka Iaitylli kin shah pynhiar kyrdan sha ka Fourth Division.
Ha ka jingïalang sam khusnam ka SSA ka la shim ïa ka lad ban pynkup burom ïa ki lai ngut ki nongpynïaid jingïalehkai lane ki match official, ba kynthup ïa u Pynskhemhame Mawthoh, u Jespar Syiemlieh bad ka Pipilmoris Wanniang kiba dang shen ki la pass ïa ki eksamin AIFF Level 5 ban ïoh ïa ka kyrdan Category 5 kum ki referees/assistant referee.
