Shillong, Nailar 02: Ka long ka miet ba sah jingkynmaw ïa u Redeem Tlang hadien ba une u rangïalehkai ka jylla Meghalaya u la ïoh ban pynkhihjar ha ka jingïakhun kaba 100 jong u na ka bynta ka NorthEast United FC ha ka Durand Cup 2026.
Kane ka kynhun kaba la jop arsien ïa ka Durand Cup ka la sdang ban ïada ïa ka nam lahduh jong ka da ka jingjop kaba khraw pyrshah ïa ka Bodoland FC da 6-0 kol ha Indira Gandhi Athletic Stadium ha ka janmiet jong ka sngi Saitjaiñ ha ka jingïalehkai ba nyngkong jong ka Group F.
U Alaaeddine Ajaraie (45’+3, 67’, 86’) u la long u namtam ha kane ka jingïalehkai da kaba thep hat-trick, katba u Lalrinzuala Lalbiaknia (58′), u Redeem (70′) bad u Antonio Moyano (90’+1) ki la bynrap mar kawei ban sdang ïa ka jingïada da ka jingjop kaba shongkun.
