Shillong, Nailar 02: Ki nongialam ka Umrynjah sports club ha ka sngi Saitjain ka 1 tarik u Nailar, 2026, ha ka jingplie pyrda ia ka football tournament hapoh shnong Umrynjah ki la ainam bad iaroh ia u bah PT Sawkmie, ba wat um long MLA shuh hynrei ki iohi ia ka jingthrang jong u ban kyntiew ia ki samla ha ka liang ka football bad kiwei kiwei de ki jingialehkai sports.
Kine ki nongialam kiba la pynpaw ia kane ki long u President ka Umrynjah SC, u samla E. J Umdor bad u Secretary, samla L. Kharshiing.
Na ka liang u MLA barim u bah Sawkmie ruh u la pyrto bad iaroh ia ka Umrynjah SC, wat hapdeng bun ki jingeh ka dang lah ban pynlong manla u snem ia ki tournament jong ka.
U pynpaw ruh sha ki nongialehkai, la ka dei ha kam ialehkai football ne kiwei ki sport, ki nongialehkai ki donkam ban pynshitom ban kiew.
Ha kane ka sngi la ioh ruh ia ka jingkren na u Rangbah Shnong ka Umrynjah u bah J. S. Nongdhar ha ka jingdon ryngkat ka kong Pynhun Rynjah, kawei na ki nongbei tyngka ia ka Rynjah United SC bad kiwei kiwei.
Ha ka jingialehkai plie pyrda ha kane ka sngi ka Rynjah United SC ka la pynliem ia ka Umden Mission A da 2-1.
Baroh ki kynhun kiba ia shim bynta ha kane ka lympung ialehkai phutbol ba la pyniaid da ka Umrynjah SC ki don 32 tylli na kylleng ki thain ka Mawlai bad Ri-Bhoi.
