Lyngba ka FCRA bill 2026 thmu ka RSS bad BJP ban buh jingma ïa ki rit paid Khristan ha ri India

Shillong, 31 Naitung: Ka Meghalaya Congress Pradesh Committee (MCPC) kala kynnoh ba ka jingkwah jong ka BJP lyngba ka RSS ban wanrah ïa ka Foreign Contribution (Regulation) Amendment Bill, 2026 ka long ban buh jingma ïa ki rit paid bad khamtam Balang bad ki seng trei mon sngewbha kiba don ha satlak ka ri India.
Haba kren bad ki lad pathai khubor u Bah Jonathan Syiem u la ong, Kaei ka jingthmu jong ka BJP ka long ban pynduh pyndam lane thew beit beit khamtam ïa ki jaka ai jingshakri jong ki khristan kiba don hapoh ka ri India.
“Ha satlak ka ri India ki jaka ai jingshakri kaba bha tam lada ngi dei naduh Delhi haduh ka jylla jong ngi kila ai jingshakri shibun eh na ka bynta ki khun ki kti jong ngi, hynrei ban thew beit beit ïa kata ki RSS bad BJP ki wanrah ïa kane ka aiñ kumno ban pynduh jait syndon ki jaka ai jingshakri paidbah kiba don hapoh ka ri India” ong u Bah Jonathan.
Halor ka FCRA License u Bah Syiem u la ong, “Lada pynthymmai ne em ki jaka ai jingshakri paidbah kum ki skul bad ki jaka ai jingsumar jong ki khristan kim kwah shuh ban pynthymmai ïa ka license namar ba ka jingbei tyngka na shabar kim don shuh bad ki ong ban pyndam noh, hynrei ban pyndam ruh ym long”.
Ka jingmut jong kane ka bill ka long thik kum ka ktien kaba ong da shong ruh jhieh da ïeng ruh tyngkhuh bad dei hangne basa ong ym long ban pyndam namar ba lada ki pyndam noh ki jingdon jingen kin shah knieh noh ha ka sorkar bad ban ïada ïa ki jingdon jingem ki hap ban bat ïa ka license, ong u Bah Syiem.
“Kane ka bill ka ong ba ki hap ban pyntyllun ïa ka pisa ba 10 lak man ka ar snem, kaba mut ki hap ban ioh ka jingbei tyngka namar ba ri India ban wanrah shane bad kane ka long bym lah banpdiang” ong u Bah Syiem.
Na ka liang u Bah Banphira Basaiawmoit u la ong, Ka jingiapher ha kip or ba mynshwa lada kano kano ka seng trei mon sngewbha kaba ioh ïa ka jingbei tyngka nabar bad lada kim biang lyngba ka FCRA ba mynshwa ka sorkar India ka lah ban shim shipor ïa ki jaka ba ki pyniaid bad lada lah biang ki kot ki sla kala ai biang noh sha ki trai, hynrei ka FCRA ba mynta ka ong ba lada phim don ka license bad kam biang ka rukom pyniaid kam ka Assets Management kan ai lad ban pynbiang ia ki kotki sla bad lada ym lah kan knieh noh ia ki jingdon jingem.
“Ha ka por ba lah knieh ïa ki jingdon jingem ka lah ban die noh ïa ki bad ka pisa kaba mih kan leit sha ka consolidated fund of India ha kaba ka pisa kan pyniaid pat shano bad halor kane ngi kum ka Congress ngi dawa ba dei ban weng” ong u Bah Banphira.
Ha kaba iadei bad ki jingdon jingem ba ïakhleh lang ha ba shna ia ki skul bad ki jaka ai jingsumar ka don beit ka jingnoh synniang jong ki nong shong shnong ki trai baling ryngkat bad ka pisa ba wan nabar ruh ba ki pynshna ïa ki jingtei bad lada shna karma skul ba 10 kamra, 7 kamra da ki trai bad 3 kamra na ka pisa ba ioh nabar bad lada ym biang ka FCRA License lada ka knieh kan knieh beit bad kam don jingkhein ba ai ki trai
Na ka liang u Bah Manuel Badwar u la ïathuh ba katkum ka jingwad bniah jong ki la lap ba tang hapoh East Khasi Hills ki don haduh 20 tylli ki seng trei mon sngewbha ne kynhun niam kiba la register ha ka Foreign Contribution Regulation Amendment (FCRA).
Kine ki seng trei mon sngewbha kiba la register bad ka FCRA ki kynthup ïa ka Bethany Sociaty, Gordon Robert Hospital, St Joseph Convent kaba don hapoh Jaiaw, Don Bosco Technical School.Ka Provident jong ka St Edmund bad kiwei kiwei, la iathuh u Bah Badawar.