Ba kuman ka Sorkar ïa ki jingdawa ka seng, 6 tarik yn leit tur bad ker sawdong ka VPP ïa ka Secretariat

Shillong, Naitung 31: Ka Voice of the People’s Party (VPP) ha ka jingïalang jong ka State Executive Committee kaba la pynlong ha ka sngi Palei ka 30 tarik mynta u bnai ka la shim ïa ka rai ba kan leit tur paidbah noh sha Secretariat ha ka 6 tarik mynta u bnai halor ki jingkuman jong ka Sorkar jylla ia ki 10 tylli ki mat jingdawa jong ka seng.
Haba kren sha ki lad pathai khubor ha ka sngi Thohdieng u President ka VPP u Bah Ardent Miller Basaiawmoit u la ong ba ka seng kumba ka la kular ïa ki paidbah ba kan sa leit ker sawdong ïa ka secretariat ban pyni sha ka Sorkar ba katno u paidbah u la bitar ïa ki jingleh donbor jong ka Sorkar.
Katto katne tylli ki jingdawa kiba u President ka VPP u la pynpaw ka long halor u dewlynnong Lumpongdeng ba ka Sorkar kadei ban ai da ka jingthoh kaba shai ba la pynsangeh shyrta, nangta ka jingeh ba ki paid Lapangngap ki mad, ka jingwan rungtuh ki mynder ri, ka jingpynjulor ïa ka mariang da ki kompeni Coke bad cement plant ki bym ai jingmyntoi ïa ki paidbah ka jylla, ka jingpynlong jubor ïa ka public hearing ka Shree Cement bad ka jingleh donbor ka Sorkar lyngba ki pulit ia ki nongshong shnong ba pyrshah public hearing bad kiwei kiwei pat ki mat.
U Bah Ardent u la ong ba kane ka jingïaid leit tur paidbah sha secretariat ka dei kaba jaijai bad kaba ym don jingthmu ban pynmih huri hura bad kyntu ruh ïa ki paidbah kiba ïashimbynta ba kim dei ban pynmih kino kino ki jingkulmar bad na ka liang ka seng ruh kan sa buh ïa ki volunteer ban peit ba kane ka jingleit ker sawdong ïa ka Secretariat kan long kaba suk ba saiñ bad ïaid beit ïaid ryntih.
Ha kane ka jingleit tur sha Secretariat u Bah Ardent u la kyntu ïa u Myntri Rangbah ka jylla u Conrad K Sangma, nangta ïa baroh ki Myntri Sorkar ba kin don beit ha secretariat, wat la ka VPP kam don jingthmu ban leit rung shapoh Secretariat, hynrei ba kine ki heh sorkar kin ïohi shisha ïa ka jingbitar jong ki paidbah bad kumjuh ruh ba kin ïohi haduh katno u paidbah u la ngiah ïa kane ka sorkar ba la ïalam da ka NPP.
Kane ka jingpynbna jong ka Voice of the People Party (VPP) ban leit tur sha Secretariat ka long hadien ba ka seng ka la dep ban leit pynlong ïa kiba bun ki jingïalang sha ki district bad ki shnong kiba don ha Khasi-Jaiñtia Hills naduh u bnai Ïaïong, 2026.
Ka jingdawa kaba nyngkong na kitei ki 10 tylli ki long ba ka sorkar kadei ban pyndam noh ïa ka Lumpongdeng project khnang ban ïada ïa ka khyndew bad ka sawdong sawkun, ka jingkular kaba ka sorkar ka la khlei ha ka jingshah thngan ba la ïalam da ka Green-Tech Foundation ha ki khyndiat bnai ba la dep.
Ka party ka la dawa ruh ba ki District Selection Committees (DSCs) bad ka Meghalaya Public Service Commission (MPSC) ki dei ban treikam laitluid bad da kaba shit ba shai ha kaba ïadei bad ki kam thungkam thungjam. Ka la dawa ruh ba ka hok ki nonghikai dei ban burom da kaba weng ïa ki rukom treikam kiba long pyrshah ïa ka bha ka miat jong ki nonghikai.
Kiwei pat ki jingdawa ki kynthup ïa ka jingdei ban pynsangeh ïa ki nongtrei kiba la shongthait khnang ban thaw lad ai kam ai jam ïa ki samla khlem kam khlem jam, nangta ban ïada ïa ki jaka paidbah bad ban sangeh ka jingtyrwa die ïa ki jaka, ban khanglad ïa ka jingwan rung beaiñ da ki mynder ri bad ban ïada ïa ka bha ka miat ki nongshong shnong ha khappud.
Ha kawei pat ka liang, hadien ka jingïohi ba ka sorkar jylla kam shym la shah ïa ki paidbah kiba pyrshah ïa ka Shree Cement Ltd. ban pynpaw ïa ki jingsngewkhia bad ka jingïeng jong ki kumba ka long mynta, u Bah Ardent Miller Basaiawmoit, President ka Voice of the People Party (VPP) bad u MLA na Nongkrem, u la ong ba baroh kidei ban kylli mano ba ïoh jingmyntoi na kane bad balei ka sorkar ka ban beiñ ïa ki sur jong ki paidbah kiba pyrshah ïa kane ka project.
Haba jubab ïa ki jingkylli halor ki bor pynïaid distrik ba ki khanglad ïa kiba pyrshah ïa ka Shree Cement halor ka jingtyrwa ban buh ïa ka limestone mining project ha Lum Shyrman, Elaka Nongkhlieh, ba kin leit ïa shim bynta ha ka jingsngap bishar paidbah (public hearing) kaba la long ha ka step jong ka 31 Naitung, 2026, u nongïalam ka VPP u la ong ba kham mynshwa ha u bnai Rymphang, 2025, u MP ba la khlad noh u Dr. Ricky AJ Syngkon u la thoh sha ka sorkar pdeng ban kyrpad ba dei ban pynsangeh ïa ka Shree Cement project ha Daistong.
Haba ong ba ka party ka la leh baroh kat kaba lah hapoh la ka jong ka bor, u Bah Basaiawmoit u la ong ba ha jaka ban sngap ïa ki jingsngewkhia ba la pynpaw da ki paidbah, ka sorkar jylla ka la pyndonkam da la ki jong ki atiar ban khñiot ïa ka sur ki nongshong shnong kiba pyrshah ïa ka project.
U la bynrap ba kane ka mat kan long kawei na ki lamkhmat ki phang ha kane ka jingleit tur ka VPP bad ban ker sawdong ïa ka Secretariat ha ka 6 tarik u Naiur, 2026.