Sngewkhia ka ïingbishar High Court bym treikam bun ki kor CCTV ha ki Police Station ka jylla

Shillong, Naitung 31 : Ka ïing Bishar High Court ka jylla ha ka sngi Palei kala pynpaw ïa ka jingsngewkhia halor ka jingdon bun ki kor CCTV ki bym treikam ha ki Police Station ha kylleng ka Jylla bad bthah ïa ka Sorkar ban ai ïa ka jubab kaba bniah ïa ka jingpyntreikam ïa kaei kaba bthah.
Ka division bench ka Chief Justice Revati Mohite Dere bad Justice W Diengdoh ka la pynmih ïa kane ka jingbthah haba shong bishar ïa ka PIL ba la mudui da u Bah Kishan K Nongkynrih.
La pyntip ïa ka ïing Bishar lyngba ka affidavit ba la file da u Assistant Inspector General of Police (AIG) Dr SP Marak ba bun ki CCTV camera kim treikam satia.
“Ka jingbym treikam ki CCTV camera ka paw ba ki don bun tylli kum ka nuksa, ha East Garo Hills, Williamnagar kumba 50 tylli ki camera kim treikam bad ha East Khasi Hills, Shillong kumba 129 tylli ki camera kim treikam” ong ka affidavit.
La pyntip ruh ba ki camera ha Laban Police Station ki la sangeh treikam hadien ka jingpom u pyrthat, katba kiwei pat ki dei namar ka jingsniew tiar.
Ka affidavit ka pyntip ba ka Police Headquarter ka la thoh sha ka kompani ba pynpoi ïa kine ki camera ha ka 9 tarik Lber, 2026 ba kan wan jurip bad ban maramot ïa ki.
Hynrei ka ïing Bishar ka shem ba kam shym la don satia ka jingpynbeit ne ka jingshimkhia bha ïa kane ka kam, kaba ka tnad ka tip kham bha”.
Ka Sorkar ka la pyntip ruh ïa ka ïing Bishar ba ka la aiti ïa ka jingtyrwa hapoh ka ASUMP ba 25,24,34,500 tyngka ban pynkhlaiñ ïa ki kor CCTV kiba la don mynta, ban pyndait shuh shuh ïa ki CCTV camera bad ban pynkha ïa ka Centralized Dashboard Monitoring System”.
Haba shem ba ka kaiphod kam pat biang pura, ka ïing Bishar ka ong “Ngi shem ba ka affidavit kam shym la ai ïa ka jingtip kaba dei jong ki CCTV camera kiba treikam. Ngi khmih lynti ïa ka jylla ba kan ai ïa ka affidavit ba batai bniah ba mynno la pyndait ïa ki kor CCTV bad ha kiei ki police station, katno tylli kiba treikam bad katno tylli ki bym treikam”.
Ka ïing Bishar ka la shem ba kam shym la don ka jingpyntreikam ïa ka hukum jong ka ïing Bishar ba hakhlieh duh ba la pynmih ha ka mukotduma Paramvir Singh Saini v. Baljit Singh” bad ka hukum u snem 2021 ba bthah ïa ki Jylla ban file affidavit halor ka jingbhah mang tyngka bad ki sienjam ba la shim.
Ka ïing Bishar ka bthah ïa ka Jylla ba kan ai ïa ka jingtip ba bniah halor ka jingbhah mang tyngka, ka jingai contract ban pynbha ïa ki kor ba man u snem, bad haduh katno snem la buh ïa ki video CCTV. Kat kum ka jingbthah ka Supreme Court, “Ki video CCTB ki dei ban buh ym duna ïa ka hynriew bnai”.
Ka Iingkashari kala bthah ban pynlong liang mamla ïa ka Sorkar Pdeng, CBI, NIA, ED, NCB bad DRI. ïa kane ka mukotduma la buh ban shong bishar biang ha ka 20 tarik Nailar, 2026.