Ka SAR ka seng treimon sngewbha na Mawsynram ban kyntiew ïa ka jingkhuid bad ka jingkitkhlieh

Mawsynram, 31 Naitung: Ka kynhun Sweep Away Rubbish (SAR), Mawsynram ka seng treimon sngewbha kaba thmu ban kyntiew ïa ka jingkhuid, ka jingkitkhlieh ïa ka shnong ka thaw bad ka jingïashim bynta jong ka imlang sahlang ha ka jingpynkhuid ïa ki jaboh janaiñ, la plie paidbah ha ka 30 tarik Naitung 2026 ha Hall jong ka Mawsynram Border Area College (MBAC), Mawsynram.
Ïa ka jingïalang la pynlong naduh 11:00 baje mynstep haduh 2:30 baje nohphai sngi, bad la pynïaid da u Bah Healthy Marbañiang, uba la ai ruh ïa ka jingkren pdiang sngewbha.Ha ka jingkren jong u, u la ban jur ïa ka jingdonkam jong ka jingïatreilang jong baroh ki nongshong shnong ban pynneh ïa ka shnong kaba khuid bad kaba koit ba khiah.
Ha kane ka prokram, la pyni paidbah ïa ka SAR lyngba ka jingbatai shaphang ka kynhun, ki dkhot bad ka jingplie ïa ka logo jong ka kynhun, kaba la leh da u adviser jong ka seng u Dr. P Marlon Brando Rani.U la batai ïa ka jingïohi jngai, ki jingthmu bad ki kam ba ka SAR kan leh ha ki por ban wan, da kaba buh hakhmat ïa ka jingïashim bynta jong ki paidbah, ka jingpynsngewthuh shaphang ka mariang bad ka rukom pynïaid hok ïa ki jaboh jabaiñ.
Ha ka jingai jingkren jong u Bah R.H. Rapsang, Rangbah Shnong ka Mawsynram Village Dorbar, u la ai ka jingïaroh ïa kane ka sienjam kaba thymmai bad kaba don jingmut jong ka Sweep Away Rubbish (SAR).U la pynpaw ba ka rukom treikam jong ka kynhun ka long kaba dei, namar ba ka la burom ïa ka Dorbar Shnong da kaba pynpaw shwa ïa ki jingthmu jong ka bad pan jingïamynjur na ka shnong.U la ai ruh shibun ki jingai jingmut kiba donkam ban pynkhlaiñ ïa ka jingïaid shaphrang jong ka kynhun, da kaba kyntu ba kin bteng ban buddien ïa ki kam jong ki bad ban trei paidbah ha ka rukom kaba don jingïatreilang bad ka shnong.
Hadien kane, ki dkhot jong ka SAR ki la pynlong ïa ka Group Presentation, kaba la pyni ïa ki jingthmu, ki kam shnong bad ki prokram ba ka kynhun kan pyntreikam ha ki por ban wan. Ka jingpyni ka la pynshai ruh ïa ka jingïohi jngai jong ka SAR ban pynlong ïa Mawsynram kum ka shnong kaba khuid lyngba ka jingïashim bynta jong ki paidbah.
Dr. B.J. Mawrie, Principal ka Mawsynram Border Area College, u la pynpaw ïa ka jingsngewkmen bad ka jingïaroh ïa kane ka jingthmu jong ka SAR. Ha ka jingkren jong u, u la ai shibun ki jingmut kiba ïadei bad ka rukom pynïaid ïa ki jaboh jabaiñ bad ka rukom bret ïa ki niut. U la ban jur ruh ba ka por ka la dei ïa ka Mawsynram ban don noh ïa ka “scientifically designed waste disposal system” bad ban buh ruh ïa ki dustbin ha ki jaka kiba dei bad kiba la ithuh bha, khnang ba ka rukom sumar ïa ka jingkhuid shnong kan long kaba kham treikam bad kaba neh.
Ha ka jingai jingkren jong u, Bah Elias Marak, Officer In-charge ka Mawsynram Police Station, uba la kren ha ka ktien Khasi kaba shai bad kaba sngewtynnad, u la ong ba, “Ka jingkhuid jingsuba ka dei ban sdang na rympei.” U la batai ba ka kyntien “rympei” ka don jingïapher bad ka jingong tang “sdang na ïing”, namar ka rympei ka dei ka jaka kaba ai ïa ki jinghikai, ki jingsneng bad ki akor kiba tei ïa ka jinglong briew. U la ban jur ba lada ka jingkhuid ka sdang na rympei, kan sa pur sha ka shnong bad sha ka imlang sahlang baroh kawei. U la kyntu ruh ïa ka jingïatreilang kaba jan hapdeng ka SAR, ka Dorbar Shnong, bad ka Hima Mawsynram, bad u la ong ba ki shnong ki dei ban pdiang mon sngewbha ïa ki skhim bapher bapher jong ka Sorkar, khamtam ïa kito kiba kyrshan ïa ka jingpynkhuid shnong bad ka jing pynneh pynsah ïa ka mariang, khnang ba kin wanrah ïa ka jingmyntoi kaba neh ïa ka imlang sahlang.
Ha ka session kaba bud, la pynlong ïa ka Question & Answer Session, kaba la ai lad ïa ki nongwan jingïalang ban kylli bad ïatai shaphang ki jingthmu bad ki kam jong ka SAR. La pynkut ïa ka prokram da ki kyntien ai khublei na U Bah Dapmain Rani.
Ka jingïashim bynta jong ki paidbah ha kane ka kam ka la pyni ïa ka mynsiem jingïatylli bad ka jingkitkhlieh ban pynneh ïa ka jingkhuid jong ka shnong.
Ka prokram ka la rah ruh ïa ka kyntien phira kaba ong: “Ka shnong ong ïuï; ka ongkitkhlieh ong ïuï.”
Ia kane ka jingialang ban plie ia kane ka seng lah sakhi lang ruh da ka jingiadonlang ki Dkhot jong ka Executive Committee jong ka Dorbar Shnong Mawsynram, Ki Dkhot jong ka Seng Kynthei, Ki Dkhot jong ka Seng Samla, Ki SHGs bapher bapher, Ki Nonghikai College, ki Nonghikai Skul bad kumjuh ki khynnah pule bad kiwei kiwei.