24 tarik u Nailur yn sdang ka Dorbar Synrai ba 5 sngi, kubur u Lamphang ïa ka jinglyngkot ka por

Shillong, Naitung 31 : Ka Business Advisory Committee ha ka sngi Thohdieng, kala pynbna ba ka Dorbar Synrai jong ka Ïingdorbar Thaw Ain ka Jylla kan long 5 sngi naduh ka 24 tarik Nailar haduh ka 28 tarik Nailar.
Haba kren sha ki nongthoh khubor hadien ka jingialang, u Lamphang ka Ïingdorbar Thomas A Sangma ula ong ba ka Committee da kawei ka sur kala mynjur ïa kine ki sngi shong dorbar synrai.
Kiba ïashim bynta ha ka jingïalang ka BAC ki kynthup ïa u Symbud Myntri Rangbah ba khmih ïa ka Parliamentary Affairs Bah Prestone Tynsong, u Nongïalam ka Liang Pyrshah Mukul M Sangma, u Chief Whip ka Liang Pyrshah Bah Charles Pyngrope, u Secretary ka Assembly Malthus S Sangma bad kiwei ki dkhot.
“Ka BAC kala mynjur da kawei ka sur ïa ka calendar jong ka Dorbar Synrai” ong u Lamphang.
Ka Dorbar kan don 3 sngi na ki bynta ban ïakren ki kam ka Sorkar bad 2 sngi na ka bynta ki kam jong ki dhot shimet.
Halor ka jingsngew khia ïa ka jinglyngkot jong ka por, u Lamphang ula kubur ïa ka jinglyngkot jong ka por hynrei ula kular ïa baroh ki dkhot ba kin ioh lut ïa ka lad ban kren.
“Ka jingai ïa ka por ka long ka kam kaba kongsan.Ngan pyrshang kat kaba lah ban ailad ïa baroh ki dkhot ba kin pynpaw ïala ki jingsngewkhia bad ki mat hapoh ka Ïingdorbar” ula ong.